Shillong, Naitung 22: Mynta ka sngi ka seng HYC kala phah da ka jingthoh sha u Secretary jong ka sorkar pdeng ba dei peit ia ka kam pynneh khlaw bad pynneh mariang ban pyrshah halor ka jingkwah ka sorkar pdeng ban pynkylla ia ka EIA da kaba buh por tang khyndiat sngi ba ki paidbah kin ai jingmut.
Ha kane ka sngi ka seng kala leit ban ia kynduh ia u myntri ka tnad khlaw jong ka sorkar jylla u bah Lahkmen Rymbui ban ai ia ka juh ka jingthoh ban dawa na ka sorkar jylla ba ka dei ban pyrshah ia jane ka jingthmu jong ka sorkar pdeng.
Haba kren ha ki lat pathai khubor u Bah Robertjune Kharjahrin u la ong ba ka jingpyrshah jong ka seng ia kane ka jingpynbna ka sorkar pdeng long ba katkum katei ka jingpynbna ba lada ka sorkar pdeng ka kwah ban shim ia kano kano ka jaka ne ban pyntrei ia ki skhim kiba la niew ba ki don kam na ka bynta ka ri ym don kam ban pan jingmut na ki paidbah.
Kawei ruh ka long ba ia ka jingbishar paidbah la pynhiar na ka 30 sngi sha ka 20 sngi, u tei u nongialam jong ka HYC u la kynnoh ba kane ka jingpynlyngkot noh ia ka por ka thew ba la da lyngkot ka por ki paidbah kin nym tip bad haba ym tip ki lah ban iaid katba ki mon.
Ha ka jaka ba ka sorkar pdeng ka dei ban dang pynkhlain shuh shuh ia ka jingiada ia ka mariang, lyngba kane ka jingpynbna jong ka sorkar pdeng ka paw shai ba kala dang pyntlot shuh shuh ia ka jingiada ia ka mariang da kaba ailad ia ki skhim kiba heh kiba ktah ia ka mariang ba pynsted ha kaba ai jingbit.
Na ka liang jong ka sorkar kala pynpaw ha khmat jong u myntri ka sorkar jylla ba ka dei ban kyntu ia ka sorkar pdeng ba ka dei ban weng shuwa ia kane ka jingpynbna namar ka long kaei kaei kaba ym lah ban pdiang namar kan ia tyngkhuh bad ka rukom bad khydnew ha kane ka jylla Meghalaya.
Ha kane ka jingiakynduh na ka liang jong u Bah Lahkmen u la pnypaw ha ki nongialam ka seng HYC ba ia kane ka kam la leh da ka sorkar pdeng khlem da kynjoh ktien lang ia ki sorkar jylla, halor kane ka jingujor ka seng ka sorkar kan sa phah sha ka sorkar pdeng.
U Bah Robert u kyntu ia ki paidbah ba ki dei ban wan sha khmat ban ujor ia kane ka jingpynbna jong ka sorkar pdeng la dei ki seng bhalang lane ki riew shimet ban pynpaw sha ka sorkar pdeng ba kum ki paidbah kane ka jylla ki pyrshah iakane ka jingpynbna ka sorkar pdeng.
