Jowai, Nailar 24: Ki nongialam jongka Jaintia Students’ Union (JSU) sengkmie bad Shillong Circle mynta ka sngi 24th August hapoh ka jingialam jong u President ka Seng, u Rikut N. Parien kumjuh ha ka jingiadon lang u Prof. H Lamin bad ruh U President bad Vice President ka NEHUSU, kala ia kynduh ia u Vice Chancellor ka North Eastern Hill University (NEHU) u Prof. S K Srivastava ha Conference Halll jong ka Academic Block ha ka phyllaw jong kane ka skulbah.
Ia kane ka jingiakynduh la shim halor ka nongrim ban pynpaw ha khmat jong u halor ka jingslem ban tei lane ban sdang iaka tnad pule jong kane ka Skulbah kaba la tip baroh shi katta kum ka NEHU Jowai Cumpus kaba don haka shnong Wahiajer West Jaintia Hills.
Kum ban shu pynkynmaw hangne ia kane ka Campus la mut ban tei ha ka shnong Moodymmai, ha kaba ka shnong ka la ai sngewbha ia ka jaka ka shnong ha u snem 2001-2002 bad tat haduh u snem 2011-12 ym pat lah satia ban seng ia kane ka Campus bad kumta ka shnong kala shim biang ia kane ka jaka shnong kaba ka la ai sngewbha sha ka NEHU. Hadien kane na ka liang jong ka shnong Wahiajer da ka mynsiem ba sngewkhia ba dei ban don kane ka Campus ha ri lum Jaintia kumta ka la ai sngewbha noh ia ka jaka ka shnong kaba don mar syndah bad u surok na Wahiajer sha Nartiang kaba don haduh 6.46 hectare.
Mynta ka sngi haka jingiakren bad u VC ka NEHU, kaba la neh haduh ar kynta tam ei ei, ka Union kala ioh lad ban iathir sani bha halor kane ka mat bad na ka liang u VC u la pynshai sha ki nongialam ka Union ba haoid ka dei ka jingshisha bala don ka jingmang pisa da ka NEHU kaba kot kumba Tyngka 6 Klur eiei naka bynta kane ka Campus bad na kane ka pisa la dep ban pynlut haduh kumba Tyngka 7 lak tam ha ka ban buh ia ki mawpud ha sawdong kane ka jaka.
Na ka liang jong u VC u la pynshai shuh shuh ba kane ka dei tang ka jingmang pisa na ka NEHU ym lyngba ka UGC namar ba haduh kane ka khyllipmat ka UGC kam pat ai ia ka jingithuh ia kane ka Campus bad mynta pat naka liang ka sorkar kala khang ia baroh ki skulbah ban plie campus thymmai.
U VC u la ong ruh ba mynta ka NEHU kam lah shuh ban plie ia kane ka jaka pule kum kawei na ki Campus hynrei u la kular pat haki nongialam ka JSU ban sdang noh shisyndon iaki jingpule la ka dei haka kyrteng jong ka Community College lane kiwei pat ki jait college ha kane ka jaka kumba la dep mang pisa da ka NEHU bad ia kane yn sa pyntip bad pan iaka jingithuh na ka UGC ha kine ki khyndiat bnai ban wan.
Ban sdang ia kine ki jinghikai u VC ula kular ban thung noh da ka Task Force Committee hapoh ar taiew ia kaban sa Notify ha ka taiew ba nyngkong u bnai September mynta u snem bad lyngba kane ka Committee yn pyniaid shaid shaid ia ki kam naka bynta ban sdang noh shisyndon ia kine ki jingpule.
