Shillong, Rymphang 29: Ka KSU Mawkyrwat Circle hapoh ka jingialam u samla Rutherford Lyngdoh President KSU Mawkyrwat Circle bad u samla Plosborlin Kharjahrin General Secretary KSU Mawkyrwat Circle.
Haka jingiasynran lang ki nongialam ka KSU South West Khasi Hills District hynne ka sngi 29/02/2024 ki la leit ban wad jingshai bad iakynduh ia u District Medical bad Health Officer South West Khasi Hills District halor ka jingjahrngai jong ki 16 tylli ki posts naka Advertisement ba la pynmih daka ophis jong District Medical bad Health Officer .
Kumban shu pynkynmaw , ka la don ka jingpyntip bad jingbthah na u Dr. Joram Beda IAS uba dei u Commissioner bad Secretary Health and Family Welfare Department lyngba ka shithi No. NAM-MSAS/Recruit/Ayush-Hosp/09/2024/352.
Kane ka long katkum ka shihti haka 5 tarik Rymphang 2024 ia kaba la bthah ha u Deputy Commissioner cum Chairman District Ayush Society South West Khasi Hills District halor ka jinglait jongki 40 tylli ki kam ha ka 10 Bedded Ayush Hospital.
Hynrei kaba sngewsih pat ka long haka Advertisement ba la pyllait paitbah haka 23 tarik February 2024 ka seng ka la lap ba ka ophis jong u DMHO jongka South West Khasi Hills District ka la pynbna paitbah haki lad pathai khubor tang 24 tylli ki posts bad 16 tylli pat ki la jahrngai noh bad ym shym la pynbna lang haka Advertisement.
Ka seng ka don ka jingsuba ba kane ka lah ban don eiei sha lyndet bad ka lah ruh ban don ka jingthmu ban thungkam sopsop da mano re mano ka ban long ruh ka jingkhanglad iaki samla thepkam thep jam jongka thain.
Ka seng ka pynpaw iaka jingsngewpyrshah jur halor kane ka jingleh sopsop jongka Health Department bad ka la dawa ruh na u DMHO ba u dei ban phah pyllait paitbah mardor ia kine ki post khnang ba ki samla kin ioh iaka lad ban thep kam bad iakhun iaki interview.
Ka seng ka pynrem jur ia kane ka jingleh jongka Department bad ka kyrpad ia u DC South West Khasi Hills District ba u dei ban tuklar mardor ban bthah ia kane ka ophis ba ka dei ban pynbna paitbah mardor ia kine ki post hashwa ba ka seng kan shim da kiwei pat ki sienjam ba kham tyngeh .
Ka seng ka kyntu ruh iaki samla thepkam ba ki dei ban mih shakhmat halor kine ki jingpyrshang ban leh sopsop da mano re mano khnang ba kiba kum kine ki jingpyrshang iuhroit iaki samla thepkam kin nym Jia shuh nangne shakhmat. Kane ka dei ka kyrwoh na u samla Plosborlin Kharjahrin, General Secretary, KSU Mawkyrwat Circle
