Shillong, Lber 27: Ka Khasi Students’ Union lyngba ka Employment Monitoring Cell mynta ka sngi ka la leit ban jurip ia ka Roster Register ha NEIGRIHMS kala leit pan jingpynshai na u Deputy Registrar jong ka NEIGRIMHS ha 24 tarik u Lber, 2025 halor ka advertisement ba dang shu pynmih jong ki Nursing Officer bad kiwei kiwei ki post.
Katkum ka advertisement ka don 105 tylli ki post jong Nursing Officer ba la pyllait bad ka bhah jong ki ST (K/J/G) dei tang 2 tylli na ka 105 tylli. Halor kane ka bynta na ka liang u Deputy Registrar u pynshai ba ki bud thik ia ka roster bad kam shim don kano kano ka jingleh shiliang ia ki Khasi.
Kaba la pynlong ia ka Seng ban dawa ban peit ia kata ka roster register. Hadien ka jingiatainia na ka liang u Deputy Registrar u la hap ban kohnguh bad ban ailad ia ka Seng kan peit ia ka Roster Register bad ki Recruitment Policy jong ka NEIGRIHMS.
Ha ka jingiakynduh bad jingleit peit bad jurip ia kata ka Roster Register ba la pynbiang na ka liang ka NEIGRIMHS, ka Seng ka la lap ba don shibun ki jingduna ha kaba iadei bad ka bhah thungkam jong ki Khasi Jaintia ha NEIGRIHMS.
Ka Seng ha kine ki sngi kan leit buh ia ki mat jingdawa ban pynneh ia ka hok jong u trai muluk trai jylla. Katkum ka jingsakhi ka Seng ia ki kam baheh bad ki permanent post hi la bat da kiwei ki bym dei ki Khasi bad bun na ki Khasi kiba trei hangtei ki dei tang kiba trei contractual.
Lah ioh ban peit bniah iaki sakhi ha kaba iadei bad ka recruitment jong u snem 2023-24 bad ki snem ba ladep, halor ki jingmih na katei ka jingiakynduh, ka Seng kan sa rah iaki mat jingdawa ha ka jingiakynduh bad u Director ha ki Sngi ban wan.
