Shillong, Jylliew 20: Ka Hynniewtrep Youth Council CEC mynta ka sngi ka 20 tarik u Jylliew 2024 kala kynnoh ba kala don kata ka jingbam sap hapoh ka Directorate of Housing jong ka sorkar Jylla ha ka ba iadei bad ki tinsop iing ki ba thmu ban sam sha ki paidbah ka Jylla.
Halor kane ka HYC kala kam ba lap ba ka Directorate of Housing ka la thung ia ka company ka ba latip kum ka Hariana Iron Works Pvt. Ltd ka ba na Kolkata ha ka ban pynpoi ia ki tin sopiing sha ki Block bapher bapher jong ka Jylla.
Haba kren ha ki lat pathai khubor u bah Roykupar Synrem u ba dei u President jong ka seng u la ong ba kat kum ka jingioh jigntip jong ka seng ia ka jingujor na ki paidbah ba ki la ioh ban pdiang da ki tin ki ba tad dor ha ka ban tap tang ia ki iing jongki mrad ruh kam long.
U la ong ruh ba ha ki snem ba la dep ka sorkar lyngba ka Housing Department ka jukhot ia ka tender ha ka ba kala buh ba ka jingjrong jong ki tin kadei ban long 8 haduh 9 feet bad ka jingheh ka dei ban long 800 mm bad ka jingryben ka dei ban ymduna iaka 0.45mm.
U bah Synrem u la ongruh ba ka Sorkar ka la buh ba ki tin ki ba dei hok ba ki paidbah ki dei ban ioh ki dei ban don ia ka jingryben ka ba ymduna ia ka 0.45mm katba ki tin ki ba la pynpoi da kane ka company ka jingryben ka long tang kumba 0.25mm bad kane ka la dei ka jingiasyla lang ha ka ban bam ia ka pisa u paidbah, la kynnoh u President ka HYC seng kmie.
U Bah Synrem u la ongruh ba kat kum ka jingioh jingtip jong ka sneg ba kane ka Company ba ka sorkar ka la ai ia kam supply sha ka Hariana Iron Works Pvt. Ltd ka ba na Kolkata u la ong ha ba ki peit ia ka company profile la lap ba kane ka company kam don bynta eiei ha ka ban shna ne supply ia ki tin hynrei ka dei tang ka company ka ba shna ia ki Steel pipe.
Ka jing kylli ka ba mih mynta ka long ba mano ba jied ia kane ka company ban supply ia kine ki tin sopiing. U la ong ruh ba la da ka Directorate of Housing ka ba dei ka nong thied ka buh ia ka order ban thied ia ki tin ki ba 0.45mm balei kane ka company ka pynpoi ia kine ki tin ki ba tang 0.25mm.
U bah Synrem u la ong ba na ka liang ka seng ka la phah da ka jingthoh sha u myntri rangbah ka jylla kumjuh ruh sha u symbut myntri rangbah kumjuh sha u Myntri ka tnad Housing u M Marak ha ka ba ki la buh ia ki jingdwa ba baroh kito ki tin ki ba kane ka company ka la dep ban pynpoi sha ki Block ka sorkar ka dei ban pynphai noh bad ka sorkar ka dei ruh ban pynsangeh noh ia kane ka jingsam ia kine ki tin soping.
U la ong ruh ba ka sorkar ka dei ban don da ka phah tohkit ha kaba ia dei bad kane ka jingthied tin sop iing. U la ong ruh ba ka sorkar ka dei ban pynshitom ia u ne ka directorate jong ka Housing kat kum ki kyndon ain. U la ongruh ba ka sorkar ka dei ban blacklist ia kane ka company bad ym dei ruh ban shah ba kino kino ki tnad sorkar kiba don kti bad kane ka kompeni.
