PHOTO DIVISION (PIB)
Guwahati, Nailur 30: Ka Myntri Sorkar Pdeng ba dei khmih ia ka Tnad Kam Pla Tyngka Nirmala Sitharaman, ka la sdang ia ka jingleit jong ka kaba lai sngi sha Arunachal Pradesh mynta ka sngi da kaba pyniaid ia ka jingialang ha Itanagar.
La pynlong ia kane ka jingialang ban peit ia ka jingtreikam jong hynniew tylli ki Regional Rural Bank (RRB) kiba treikam ha ka thain shateilammihngi ha ki jylla Arunachal Pradesh, Assam, Manipur, Meghalaya, Mizoram, Nagaland, bad Tripura.
Ha kane ka jingialang la wan iashim bynta da u M. Nagaraju, Secretary, ka tnad Financial Services, ha ryngkat ki ophisar na ki tnad Kam Pla Tyngka jong baroh ki jylla ka thain shateilammihngi bad ruh ki khliehduh jong ki bank ba iashim bynta. Ki ophisarna ka RBI, NABARD, SIDBI, bad kiwei kiwei ruh ki la iadon lang ha kane ka jingialang.
Ha kane ka jingialang, ki jingiakren ki la long halor ka jingkyntiew ia ka jingtreikam, ka jingkyntiew ia ki jingai jingshakri lyngba ka digital teknoloji, bad ka jingkyntiew ia ka jingkiew ki kam khaii pateng kiba iadei bad ka kam rep bad ki kam MSME.
Ka Myntri ka la kren shaphang ka bynta kaba khraw jong ki RRB ban kyrshan ia ka ioh ka kot ha ki jaka nongkyndong bad ka la kyntu ia ki, bad ki bank kiba iarap ia ki, ba kin peit bniah ia ka jingwad ia kito kiba dei ban ioh jingmyntoi na ki skhim ba kyrpang jong ka Sorkar India, ba kynthup ruh ia ka PM Vishwakarma.
Shuh shuh, ka Sitharaman ka la bthah ia ki RRB ba kin kyntiew ia ka bynta jong ki ha ka jingai ram na ka bynta ki kam rep, ha ka jingpeit kham bniah ia ka kam horticulture bad kiwei kiwei ki kam kiba iadei bad kane kum ka jingrisniang, jingrisyiar, ki kam kiba iadei bad ka dud bad ka jingridohkha, khnang ban kyntiew shuh shuh ia ki lad kamaijakpoh ha ki jaka nongkyndong.
Ha ka sngi ba ar ba kan don ha Arunachal Pradesh, ka Myntri ba dei khmih ia ka tnad Kam Pla Tyngka kan leitjngoh ia ka Namsai, ha kaba kan plié paidbah ia ka SBI Regional Business Office ba thymmai, ha ryngkat kiwei kiwei ki kam kiba thmu ban kyntiew ia ka jingioh bynta ha ki kam pisa bad kiba plié lad ia ka jingkiew ka ioh ka kot ha kylleng ka thain shateilammihngi.
Ha ka sngi kaba khatduh jong ka jingleitjngoh ka Myntri ia ka Arunachal Pradesh ha ka 2 tarik u Risaw, ka NirmalaSitharaman kan iashim bynta ha ka prokram Swachhata Hi Seva ha Namsai.
Kane ka jingiashim bynta ka dei ka dak jong ka jingkut jingmut ka Sorkar na ka bynta ka jingkhuidjingsuba bad ka bha ka miat jong ka imlang sahlang kum shi bynta ka kam kaba dang iaid ha kylleng ka ri.
