Shillong, Risaw 07: U Deputy Commissioner jong ka East Khasi Hills District u Bah PS Dkhar mynta ka sngi u la khot ia ka jingialang ia ki dkhot jong ka Coordination Committee on International Border (CCIB) bad kum juh ia ki trai jaka ban ia kren halor ka jingthmu ban jurip ia ka jingker ksainar shiah haki bynta jong ka East Khasi Hills District.
Ha kane ka jingiakren na ka liang jong u Deputy Commissioner ka East Khasi Hills District u Bah Dkhar ha kaba la don lang ruh u ADC, u la kyrpad ia ki dkhot jong ka CCIB bad ia ki trai jaka ba kin nym pynthud ha kaba ia dei bad ka jingphah jurip biang ia ki jaka ban ker ksainar shiah ha khappud bad ka Bangladesh.
Ha kane ka jingialang na ka liang jong ki dkhot ka CCIB bad na ka liang jong ki trai jaka kila ai ka jingkular ia u DC ba kin nym pynthud ha kaba ki bor sorkar kin jurip ia ki jaka ban ker ksianar shiah kaba dang sah mynta kumba hynniew kilometer ha ki bynta jong ka East Khasi Hills.
U Bah K Myrshiang secretary jong ka CCIB haba kren ha u SP News Agency u la ong ba kaei kaba ki kwah ka long ban phah jurip biang ia u pud u sam namar ba kim hun, na ka liang jong ki kim don kata ka jingthmu ban pyrshah ia ka jingker ksianar shiah ki ruh ki kwah hynrei shuwa ban leh dei ban pynbeit shuwa ia u pud u sam.
Kane ka 7 KM kaba dang sah mynta ki hap ha ki ar tylli ki raid ka Raid Mawshun bad raid Mukiartila. Na ka liang jong ki trai jaka bad ki dkhot ka CCIB ki da sngew burom ia u Deputy Commissioner u bah Dkhar namar ba u da khot ia ka jingiakynduh ia ki trai jaka shuwa ban leh ia ka kam ym kum u DC ka West Jaintia Hills u ba la shu thom da kabor, la ong u Bah Marchiang.
