Shillong, Nohprah 21: Ka jingkyrmen ia ka Meghalaya ba ka lah ba kan ioh ba kan buh jaka lem sha ka lympung ialehkai ka Santosh Trophy ka la wan ba kan mih paw hynne ka janmiet hadien ba ka Arunachal Pradesh ka kla lah ba kan pynliem ia ka Suikkim da 1-0 ha ka jingiakhun kaba ar jong ka Group E ka Senior Men’s National Football Championship for the Santosh Trophy 2025-26, kaba la long hynne ka janmiet ha SSA Stadium, First Ground, Polo.
Ia kane ka shi kol kaba kordor tam ia ka Arunachal Prradesh la thep ia ka da u Rinchin Dorjee Karma ha ka minit kaba 57.
H aka jingshisha na ka liang ka kynhun ialehkai ka Sikkim ka nam iakhaid kan jin da la biang pura ia ka ba kan buh jaka ialade sha ka wat iakhun ba khatduh (final round) jong kane ka lympung, kaba jia hadien ba ha ka jingiakhun ba nyngkong ka jong ka, ka la jop da 2-1 ia ka Meghalaya.
Tad haduh ba kut ka jingiakhun ba hynne ka janmiet, ka Sikkim bad ka Arunachal Pradesh ki la ioh ba kin ia khur mar lai point, kaba hangne kaei kaba donkam ia ka Meghalaya ka long ba na ka liang ka jong ka, long katba ka long ka donkam beit ba kan pynliem ia ka Arunachal Pradesh, ha ka jingiakhun kaban long ha ka sngi Hatmajai jong ka taiew.
Lada jia ba ka Meghalaya ka jop ia ka Arunachal, baroh lai tylli ki jylla kin ioh ban ia khur mar lai point, kaba hangne ia ka rai mano napdeng jong ki ban jam shakhmat, ka jingkhein ha ka liang ka jingioh ban thep kol (goal difference) kan hap bakan treikam, kaba hangne, ka jingkhang ia ka Meghalaya ban lah ban jam shakhmat ka donkam ba kan pynliem la kumno kuno da kumba 2-0 ia ka Arunachal Pradesh, katba na ka liang ka Arunachal, ka jingiakhaid ka la biang pura ia ka ban jam shakhmat na kane ka group.
Kane ka shi kol ba ka Arunachal ka la ioh ba kan thep ka la wan hadien ba u Rinchin u la ioh ban khyrwit jam bha ia ka bol ban pynkhih ir ia ka jar, ha kaba ka jingiakhun na kane ka Group hi ka long ba baroh lai tylli ki jylla ki long kiba ia biang bor bha, katno tam lei lei naka bynta ka Meghalaya kaba kan donkam bha ruh ia ka jinghiar ban ai mynsiem u paidbah nongkyrshan u jong ka ha ka jingiakhun kaban wan.
Ia kane ka jingiakhun kaba hynne ka janmiet la wan ban sakhi lang ruh da u Treasurer ka All India Football Federation u Kipa Ajay bad ban synran lang ia u da u President ka Meghalaya Football Association u bah Hamletson Dohling.
