Shillong, Jymmang 02: U bah Erwin K Sutnga shongknor jong ka Joint Action Committee Border of Meghalaya (JACBOM) u kyrpad ia baroh ki paidbah ki seng bhalang jong ka jylla ban ia tylli kawei ha kaba ia dei bad ka kam pynbeit pud.
Haba kren ha ki lat pathai khubor u shongknor jong ka JACBOM u khot u were ia baroh ki nongialam kiba don kata ka jingkhit khlieh na ka bynta ka imlang sahlang, khatam ia ki seng bhalang kiba bun bah, kum ka seng HITO u kyntu ba kin ia pyrkhat bha namar kane ka jingialeh kaba mynta ka long na ka bynta ka pateng ban dang wan ruh.
Kum ka kynhun hap ban ia pynbeit namar, ki seng ki don la ka jong ka jong ka rukom treikam, ka HANM, ka HITO, KSU, FKJGP, RBYF, HYC ter ter ki don la ka jong ka rukom trei kam jong ki, ha ki District ruh ki don ki seng kum ka JSU bad kiwei kiwei kiba don la ka jong ka jong ka rukomt rei kam hynrei ha kane ka phang kaba don kam, ia kane ka bynta don kam ia ka jingiatreilang.
U bah Erwin u la ong ba ki nongbat ia ka khyndew kidei ki Dolois, ki Syiem ki Nokmas ia ki dei ban khot lang, la kyntu ia baroh ban ia klet noh ia ka jingia sngewpher namar kum ki briew don beit ia ka jingduna la kyrpad ia baroh ban ia treilang.
Ha kane ka sngi u bah Erwin u la ong ba ka jylla Meghalaya ha ka por ba soi ia ka Instrument of Accession ha u snem 1947 ka jaka hapoh ka Ri Khasi Jaintia ka don 22,600 Sq Kilometer bad ha ka por ba ioh ia ka jylla Meghalaya ha u snem 1972 ka long tang 22,200 sq kilometer.
U Bah Erwin la ong ba ka JACBOM kala sdang ban trei kam bad ha kine ki sngi kan sa leit ban pynlong ia ka jingialang bad ban thaw ia ki committee bapher bapher, la ong ba kin trei shitom kin trei minot bad kin pynlut la ka bor ban ia leh ia kane ka kam, don kam ia ka jingkyrshan jong ki paidbah.
Ka jingpyrkhat ha kaba ia dei bad kane ka long kumno la kin leit sha Supreme Court lane sha High Court, bad ka jingdawa mynta ka long ba dei ban pyntrei kam ia ka artikle 263 ban ioh ia ka Inter State Council ba kan bishar bniah ia kane ha ka lynti kaba dei.
