Shillong, Jymmang 20: Ka Mawlai Town Dorbar kaba la ia khun pyrshah ia ka jingioh ban rung jong u Drug sha ki shnong bapher bapher jong ka Mawlai mynta ka kynti ki la lah ban pynkylla thymmai pat ia ka jingim jong ki 30 ngut tam ki samla ki ba la im kyrni ha ka jingdih ia u Drug ha ki snem ba la leit noh da ka ba ai ia ka jingiasynlok ka ba manla ka sngi mynta la 9 bnai tam eiei ha ka training center jong ka North Eastern Security Academy ka ba don ha khmat jong ka sorok VIP road ha ka Shnong Mawkynroh Umshing.
Khnang ban Pyntyllun ia kane ka kam na ka liang ka sorkar Jylla ka la ioh ban ai da ka jingiarap song Pisa ba 6 lak tyngka ha ka sien ba nyngkong bad mynta ka sngi ka 20 tarik u Jymmang 2024 ka sorkar Jylla ka la thep jingiarap sa 15 lak tyngka sha ka Mawlai Town Dorbar bad ka pisa baroh ka ba ki la ioh jing iarap ka la kot sha ka 21 lak tyngka.
Ha ba ioh ban ia kren bad ki Nongthoh khubor na ka liang u Myntri ba dei peit ia ktand Social Welfare u bah Paul Lyngdoh u la ong ba ka Mawlai Town Dirbar kan dei ka kynhun ka ba nyngkong eh ha ka Jylla ka ban ioh ia ka jingkyrshan pisa na ka sorkar ha ka ban pynbha pat ia ka jingim jong ki samla ki ba la ngop ha u Drug.
Ha ka ba iadei bad ka jingpan jaka ha ka ban tei ia ka Rehablitation center u bah Lyngdoh u la ong ba ka sorkar Jylla ka la thmu ban shna ia kane ka center ha ka jaka ka ba don ka Tribal research Institute ka ba ha Mawlai Nongkwar ia ka bayn sa lah ban pyntrei kam pura ynda la lah ban pynkynriah ia ka ktem ki shipai CRPF sha poh ka New Shillong Town ship ia ka ba mynta kajing pyntrei ka la iaid shaid shaid.
Ha ba ioh ban ia kren bad ki nong ialam jong ka Mawlai Town Dorbar ki la pynpaw ba ha kane ka jingiaid lynti jong ka Mawlai Town Dorbar ha ka ban lum bad ban lang ia ki khynnah ki la ngop ha u Drug ki la don shi bun ki samla ki ba la phet noh tang shi teng por khlem da lah ban pyndep Ia ka jingshah sumar jong ki ha poh jong kane ka rehabilitation center na ki daw ki ba bun bad ki don ruh ki ba lah ban shah ha kane ka jaka sumar.
Ki nong ialm jong ka Mawlai ki la pynpaw ruh ka jingkmen ia ka sorkar bad kumjuh ruh ia ki sengbhalng ki ba la wan shakhmat ban ai ka jingiarp ha ka ban ia sylok bad kine ki khynnah ki ba la ngop ha u Drug bad ki la pynpaw ruh ba ka jing thmu jong ka Mawlai Town Dorbar ka long ba kin ioh ban plie ia noh ia ka counseling center khnang ba kin lah ban ai ka jingia sylok sha kine ki samla ki ba la ngop ha u Drug u ba long kum u nongshun u ban ban duh ia ki long iing ki longsem bad kumjuh ruh ia ka ri bad ka Jiadbynriew.
