La ai jingbit ia ki klass VI, VII, VIII ban  leit sha ki skul ban shim jingiarap na ki nonghikai

Shillong, Risaw 7: U Myntri ba dei peit ia ka tnad pule puthi jong ka sorkar jylla u bah Lahkmen Rymbiu u la iathuh ba ha ka jingialang kaba la long mynta ka sngi la ia kren halor ka rai jong ka tnad kam poh iing ka sorkar pdeng ha kaba ia dei bad ki skul namar ba la ai jingbit ba naduh ka 15^th Risaw ka MHA kala ai jingbit ia ki sorkar jylla ba kin shim ia ka rai.

Ha ka jingialang kaba la long mynta ka sngi la shim ia ka rai ba, kumba la leh ia ki khynnah pule Class IX, X bad XI bad XII, ia kane ka juh ka rukom yn shah ruh ia ki Upper Primary shaneng kan long kum juh ba kin leit sha ki skul ban shim jingiarap na ki nonghikai.

Kumba ka long ia ki khynnah pule naduh klass IX haduh XII la shah ba kin leit sha skul ba kin leit ban shim jingiarap na ki nonghikai, kumta ka jingialang ban shah ia ki khynnah pule kiba naduh klass VI haduh Class VIII ba kin lah ban leit sha ki skul ban pan jingiarap na ki nonghikai ha ki skul.

U Myntri u la ong ba ki skul naduh ka 15^th Risaw 2020 ki dei ban plie bad ka jingplie ka long ym na ka bynta ba kin pynlong long skul hynrei na ka bynta ban ai jingiarap ia ki khynnah ba ki khynnah klass VI, VII bad VII kin sngewtuh ia ka syllabus kaei kaba ki pule mynta bad ki ei ki lynnong ba kim don kam ban pule.

Ka sorkar ka leh ia kane namar la iohi ba ha kane ka jingdon kane ka khlam COVID-19 la iohi ia kiba don bad ki bym don, ka iohi ba shibun ki skul kim ioh lat ban leh ia kine ki online klas namar wat ki nonghikai  sha ki nongkyndong kim don ia ka data jong ka Internet ban ai jingtip sha ki khynnah lyngba ka online.

Dei halor kane ban ai lad ia ki khynnah skul ba kin ia kynduh ia ki nonghikai ba kin pan jingshai ban sngewthuh ia kaba kim sngewthuh ka sorkar kala rai ba naduh ka 15^th Risaw 2020 ki khynnah ki la lah ban leit sha ki skul ban pan jingpynshai na ki nonghikai ha kaba ia dei bad ki subjek.

Haba ia dei bad ki kyndon ka long ba baroh ki hap ban but ia ki kyndon kiba la pynmih ha ka 17^th Nailur bad ha ka 1 Risaw 2020. Na ka bynta ban plie ia ki skul, kam long kaba suk ia ka sorkar ban kynjoh ktien ia baroh kiba don ha ka jylla namar ki don haduh 15000 tylli ki skul baroh.

Dei halor kane ka sorkar kala ai da ka jingthoh sha u Director ka tnad pule puhti ba un thoh sha ki Director School education and Literary lane sha ki District School Education officer bad sha ki  Sub-Division School Education officer ba kin ia mir jingmut bad kito ki nongpyniaid ia ki skul bad ki nonghikai la kala long ban plie ne em.

Haba ia dei bad kane ka jingiamir jingmut  bad ki nongpyniaid skul la bthah ba kin pyndep hapoh ka 13^th Risaw 2020 bad ia ka kaiphot ban pynpoi sha ka sorkar ha ka 14^th Risaw 2020 bad ha dien ka 14^th Risaw ka sorkar kan sa shim ia ka rai halor ka kaiphot kaba kin sa phah.