Shillong, Iaiong 12: Ka jingialang jong ki kynhun jong ki seng bhalang kiba la long mynta ka sngi ha Tura kaba kynthup ia ka HYC, JNC,JSM,CORP, GSMC, ACHIK, APA bad UASCJF, kila shim ia ka rai ban pynimbiang ia ka COMSO bad la jied ia u bah Roykupar Synrem president ka HYC ban long u shongknor jong kane ka kynhun ki seng bhalang.
Ka phang pdeng kaba kila ia kren ha kane ka jingialang ka long ba kila pynkhi im biang ia ka COMSO, ka jingiakren ha kaba ia dei bad ka jingdawa ia ka Inner Line Permit, ka jingiakren ia ka MRSSA bad ka jingmang kam ha ki ophis jong ka sorkar pdeng 44%.
Ha kane ka jingialang kila kren ba kumno kin ia treilang ha kaba ia dei bad ki mat kiba kwah ia ka jylla, kum ka jingwan klun jaka ka Assam, ka jingpynkylla ia ka St Order jong u snem 1951 kine ki long ki nuksa ba kin ia treilang kum ka COMSO.
Nalor u shongknor la jied ruh ia ar ngut ki symbut shongknor, u Sambormi Lyngdoh President ka JNC, u Roger D Shira President ka APA, u Balvarin Ch Marak la jied ia u kum u general secretary bad hynriew ngut kiwei ki nongkit kam bad la jied ia u Cherian Momin kum u nongai buit.
