Shillong, Naiwieng 02: Ka iing dorbar jong ka KHADC haduh mynta ka sngi ka dang sah khlem pat don nongpeit nongsumar namar ba u Lat jong ka jylla u V Shanmuganathan um pat hung ia u pro-term Chairman wat la u Secretary jong ka Legislative jong ka KHADC u la dep pyntip sha u Lat ka jylla lyngba jong ka tand DC(A).
U myntri ba dei peit ia ka tand District Council Affair u Bah Prestone Tynsong u la iathuh ba na ka liang jong ka sorkar kala dep ban phah ia ka kyrteng sha u Lat jong ka jylla ban thung pro-term chairman hapoh ka iing dorbar jong ka KHADC. La ong ba ia mynta ym pat lah ban iathuh namar ba ym pat ioh ia ka jingmynjur jong u Lat ka jylla.
Na ka liang jong u CEM jong ka KHADC u Bah PN Syiem u la iathuh ba haduh mynta kim pat ioh ia u pro-term chairman hapoh jong ka KHADC . Kane ka jingthylli kane ka shuki Chairman hapoh jong ka KHADC ka dei ha dien ba u Bah Manstudy Nongrem u la hiar shuki noh da kaba resign na ka kam.
