Shillong, Naiwieng 29: Ïa ki jingiakhun quarter final jong ka 7th Elite Men’s National Boxing Championship la lah ban pyndep ha ka sngi Balang ha SAI Indoor Hall, ha kaba ki khlur iakura kiba paw ki la jam sha ka semi final.
Ha kane ka sngi, u Myntri Rangbah ka Jylla u Conrad K Sangma u la wan sakhi ia kane ka lympung iakura ha kaba u la ioh ban iakren bad ki rangialehkai. Ha kane ka sngi u la ioh ban pynlut por na ka bynta ban sakhi ia katto katne por ki jingialehkai.
Kane ka lympung ka ban kut ha ka 1 tarik u Nohprah, la pynlong da ka Meghalaya Boxing Association ha ryngkat ka jingïatrei lang bad ka Boxing Federation of India bad kaba la kyrshan lang da ka tnat Sports and Youth Affairs jong ka Sorkar Jylla.
“Ka long ka jingkmen kaba khraw na ka bynta jong ngi ban ioh pynlong ia kum kine ki lympung ialehkai ha ka nongbah Shillong. Ka Sorkar jong ngi ka ai jingkyrshan pura na ka bynta ki lympung ialehkai ki ban pynlong ia kum kine ki lympung,” la pynpaw u Sangma.
“Ki jingeh ki don ha kum kine ki khep namar ngi ioh ban pynlong ia kane ka lympung. Ngin iai bteng ban nangpynjanai bad kyrmen ba ngin lah ban pynlong sa ki lympung ialehkai bari ri (international events).”
Ka Sorkar Jylla ka don ia ka thong ban ioh ba ki nongialehkai ka Jylla kin ioh ban iashim bynta ha ka Olympic ha kine ki khyndiat snem ki ban wan. Ban kynjoh sha kane ka thong.
ka Sorkar ka la pynkhreh ban bei tyngeh na ka bynta ban sei ia ki nongialehkai lyngba ka Elite bad ka Super Elite Pathway Programme ban khmih bniah ia ki khynnah ialehkai kiba don ia ka jingtbit ha kino kino ki jait jingialehkai bad ruh ban ai jinghikai pura ia ki.
“Ka long kaba kongsan ban khmih bniah ia ki sap ialehkai kiba kyrpang bad ban ai jinghikai pura ia ki khynnah bad ngi donkam ban pynthikna ba ki khynnah ialehkai jong ngi kin long kiba tyngshain,” la ong u Myntri Rangbah.
Haba pynpaw sha ki nongiakura, u la ong, “Ka jingiatrei lang kum ka kynhun ban pynurlong ia kane ka lympung hapdeng ka MBA, BFI bad ka tnat ialehkai. Nga kyrmen ba phin rah ia ki khubor kiba bha haba phi mih noh na kane ka Jylla.”
Shuh shuh u Sangma u la iakynduh ruh ia ki khlur iakura kum u Shiva Thapa bad u Amit Panghal, lem bad ki khlur iakura barim jong ka Jylla kiba la long mynta kum ki coach kata u Torak Kharpran lem bad ka Roshni Bhusal. Na ka liang ka MBA ka la ai sngewbha ia u Myntri Rangbah da shijur ki boxing gloves.
Na ka liang uwei na ki dkhot ka BFI u SK Shandil, u la ai jingiaroh halor ka jinglah ban pynbiang nadong shading bad ruh ka jingpynlong ia kane ka lympung. U la pynpaw ka jingkyrmen ba kum kane ka lympung kan long ka jingai mynsiem ia ki nongialehkai ka thain shatei lammihngi ba kin shim khia ha ka kam iakura.
Lah ban kdew ba ha kane ka lympung ki la don haduh 104 ngut ki rangiakura kiba la wan kylleng jong ka ri ban iashim bynta ha ki 13 tyli ki kyrdan ialehkai haduh ba la lah ban pyndep ia ka quarter final hynne ka sngi.
Kham hashwa, u khur iakura uba long u lahduh ha ka Asian Games 2018 u Amit Panghal na ka Services u la khur jingjop ha ka flyweight 48-51kg lyngba ka jingiarai lang da ki nongbishar pyrshah ia u Md Aarif uba na Jammu and Kashmir. Kane ka jingjop ka la long kumjuh ruh ia u rangiakura na Assam u Shiva Thapa, ha kaba une u khlur iakura ia la khur takma hynriew sien ha ka
Asian Championships, u la jam sha ka semi final ha ka light welterweight 60-63.5kg hadien ka jingjop ia u Shashank Pradhan na Delhi.
U lahduh ha ka Asian Champion 2021 u Sanjeet jong ka Services u la khur jingjop ha ka quarter final pyrshah ia u Naman Tanwar na Railways ha ka kyrdan ialehkai heavyweight 86-92kg.
Kumjuh u Sagar, uba la khur ia ka takma rupa ha ka CWG 2022, jong ka Railways u la khur jingjop pyrshah ia u Navjot Singh na ka Chandigarh ha ka super heavyweight 92kg. ha kane ka jingiakhun na ka liang u rephri u la hap ban pynsangeh tang ha ka wat kaba u Sagar ula kura tyngeh ia u rangiakura ka liang pyrshah.
