Shillong, Nailar 23: Ka prokram ban sam ia ki syrnot ia ka kynhun ba 106 jong ki shah hikai computer bad ka kynhun ba 45 jong ki shah hikai language jong ka Ramakrishna Mission Vivekananda Cultural Centre ka la long ha Shillong mynta ka sngi, ka 23 tarik u Nailar 2024.
Ha kane ka prokram, kane ka jaka ai jinghikai ka la sam 921 tylli ki syrnotia ki shah hikai Computer bad language. Ka Ramakrishna Mission, Shillong ka ai jinghikai ia kumba 6000 ngut ki samla ha ki sobjek computer, ha san tylli ki session.
Kane ka convocation mynta ka dei ia ki shah hikai jong ka Session Jylliew-Nailar 2024, ka kynhun ba 106 jong ki shah hikai kiba don kumba 1200 ngut na ki jylla bapher bapher jong ka thain shateilammihngi.
Ki khynnah kiba la wan shakhmat ki long ha ka Computer-Beginner ka Maya Boro, Intermediate –Mary Eugenia Suting; Tally-I –Amethyst M Basanshrieh; Tally-II Riya Das; DTP- MichealRynjah; Web Designing – IarilangLyngdohNonglait; Python – BapyndapborWahlang; DEO- Medarishisha L Ryntathiang.
Ki khynnah ba la leh kham bha ki la ioh ia ki memento bad ar ngut ki shah hikaiha ka kyrdan jong kiba la pyntbit bha ki la ioh ia ka jingai sngewbha da ki Computer. Kine long ka SimranKhatun bad PoojaBasumatary.
Ha ka jingai jingkren, u Swami Vedeshananda, Director, Academics jong kane ka jaka ai jinghikai u la kitbokkitrwiang ia ki khynnah bad u la kyntu ia ki ba kin pdiang ia ki jingngeit jong u Swami Vivekananda khnang ba kin ioh ia ka jingjop ha ka jingim bad u la ong ruh ba baroh ki briew ki thaw hi ia la ka lawei. U la ban jur halor ka jingdonkam ia ka pule puthi bad u la pynshlur ia ki samla ba kin don ka mynsiem ban seng kam lajong ha ka jaka ban shuap ia ka kam Sorkar.
Ka kongsan ha kane ka prokram, Kong Lucy Malngiang, Programme Executive, Akashvani ka la kren shaphang ka kam jong ka Ramkrishna Mission ha kaba iadei bad ka jingai jingsumar, ka pule puthi bad ka kam ai jingiarap bad ka la ong ba katba ki khynnah ki dang pyntbit ialade ha kane ka jaka ai jinghikai, ki dei ban don ka jingngeit halade bad ki jingthmu kiba heh.
Ka la ong ruh ba ki jingtbit ba ioh na kane ka jaka ai jinghikai kin long kum ka nongrim na ka bynta ka por ba ki la sdang ban trei. Ka la ai jingkren shaphang ka jingiadei hapdeng ki paralok bad ka jingdonkam ban nang kumno ban ioh ia ki paralok ba thymmai.
U Swami DivyaswarupanandajiMaharaj, Centre-In-Charge, u la pynkut da kaba ai jingsngewnguhia baroh kiba iadon bynta ha ka kam bad u la kren ia katto katne ki ktien jong u Swami Vivekananda ha ka ktien Phareng bad ka ktien Khasi.
