Shillong, Kyllalyngkot 12: Ka Ramakrishna Mission Vivekananda Cultural Centre (RMVCC), Shillong, ka la rakhe ia ka National Youth Day 2026 mynta ka sngi, kaba long kum ka jingkynmaw burom ia ka lyngkhuh sngikha jong u Swami Vivekananda.
Kane ka jingïalang kaba la pynlong ha jaka pule jong ka ha Quinton Road ka la wanrah lang ïa ki kynrem ki lyndan, ki samla pule bad ki samla nongialam ban puson ia ka thong jong ka jingdon bynta ba kongsan jong ki samla ban tei ïa ka “Viksit Bharat” lane ka ri India kaba la kiew. La sdang ia ka prokram da ka jingbuh syntiew ha u mot jong u Swami Vivekananda, bud sa ka jingrwai ia ka National Anthem bad ka jingthang ia ka sharak.
U Kongsan ha kane ka jingïalang u Bah B.K. U Dey Sawian, DGP barim jong ka jylla Meghalaya bad u President ka Managing Committee, RKM Shillong, u la ong ba ki samla ki dei ki “kor jong ka jingkiew shaphrang.” Ha ka jingkren ba kongsan jong u, u la ban jur ba ka jingtei kaba shisha ia ka ri ka shong nongrim ha ka jinglong bad ka jingiatreilang.
U la kyntu ïa ki samla ban long kum ki nongkit khubor jong ka jingsuk bad ka jingïatylli, ban rah ïa ka khubor jong ka India sha kylleng ki pud ki sam jong ka ri ban kyrshan ïa ka jingthmu jong ka Viksit Bharat 2047.
U Symbud Kongsan, Bah Wanshai Shynret, Deputy Director jong ka North Eastern Institute of Ayurveda and Homeopathy (NEIAH), Shillong, bad u samla pule barim jong ka Ramkrishna Mission, u la ïathuh ïa ka jingïaid lynti shimet jong u, da kaba pynshong nongrim ïa ka jingjop jong u ha ka jinghikai “ba kyntiew ia ki briew bad ba tei ia ka jinglong” jong ka Ramakrishna Mission.
U la ïaroh ïa ka jingshakri jong ka Mission ha Meghalaya, da kaba ban jur ïa ki jingïarap ba kongsan jong ka ha ka por jong ka khlam COVID-19 bad ka jingseng ïa ka kolej ba nyngkong jong ka ha Sohra.
Haba ai ïa ka jingkren, u Swami Hitakamananda uba dei u Secretary jong ka Ramakrishna Mission Shillong u la kren halor ka khubor jong u Swamiji shaphang ka jingïalong shipara ha ka pyrthei baroh kawei. U la pynshlur ia ki nongiashim bynta ban ialeh ban long “ki briew kiba kham bha” bad “ki nongsaphriang ia ka khubor jong ka jingiasuk” da kaba pyndonkam ia ki jinglong ba kynja mynsiem ha ka jingim ba man ka sngi. Ia kane lah ban leh lyngba ka jingithuh ia ka jinglong blei kaba don ha lade bad nangta ban pyniar ia kata ka burom sha manla u briew ha ka imlang sahlang.
Ha kane ka jingrakhe la don ruh katto katne ki prokram ba kongsan, kaba la sdang da ka jingpyllait paidbah ïa ka VCC Calendar 2026, kaba long ki sienjam ïa ka snem thymmai jong ka kolshor bad ka jinghikai na ka bynta ka center.
Hadien kane la pynbud da ka jingpyni ia ka kolshor, ha kaba ka bynta kaba kongsan ka long kaba la ai kyrteng “Sha ka India kaba peitmat” (To the Awakened India) da u Bah Rangkitbok C. Dohkrut, ryngkat bad ki prokram ba iphuh iphieng na ki samla.
Ka jingïalang ka la peit bniah ruh ïa ka Viksit Bharat Focus, kaba la pyni ïa ka jingpyni kaba jylliew bad kaba la pynkhreh ia ka ri India kaba la kiew bad kaba ban jur ïa ka bynta kaba donkam kaba ki samla ki dei ban leh ha kaba pynurlong ïa kane ka jingthmu jong ka ri. La pynkut ia ka jingialang da ki “kyntien ai Khublei” na u Swami Vedeshananda, Director of Academics ha Vivekananda Cultural Centre.
