Shillong, Jymmang 23: U Deputy Commissioner jong ka East Khasi Hills District u S.C Sadhu la ong ba la register ia ka ejahar pyrshah ia ki dkhot ka seng HYC da ka Suo Motu kiba la leit ban pynpra ia ki iing dieng ba don ha Lum Survey.
U Deputy Commissioner u la ong ba u la ioh ia kane ka jingtip lyngba u Superintendent ki pulit ba ki dkhot jong ka seng HYC kila leit ban pynpra ia ki iing lyntang kiba la shna beain ha katei ka jaka ha Lum Survey.
Haba ia dei bad kane ka kam, kynthup ia ki dkhot HYC, na ka liang jong ka SMB, ka SCB bad ka Defence Estate Office bad ka ophis jong ka District administration kila leit jurip lang ia katei ka jaka ar taiew ei ei mynshuwa.
Ha katei ka jingleit jurip kila ia kynduh ia ki briew kiba sah ha katei ka jaka, na ka liang jong ka ophis kala ia kren bad ka ophis jong ka DEO Guwahati bad ki dang ia kren kumno ban leh katkum ka ain.
Ha ka juh ka por ha kaba ia dei bad kane ka kam ha ka 28th Jymmang 2024 kan don ka jingbishar namar ki pan ban weng ia ka “Stay Order” ha kaba ia dei bad kane ka kam. Na ka liang jong u DC u kyntu ia ki paidbah ban nym shim ia ka ain ha ka kti.
Kane kan nym lah ban weng ia ka jingeh hynrei kan dang pynkyllain shuh shuh ia kane ka jingeh, haba ia dei bad kane la register ia ka ejahar pyrshah ia ki dkhot ka seng HYC ha kaba ia dei bad kane ka jingjia, ai ka ain kan leh ia kaba don kam.
