Shillong, Risaw 29: Ki paidbah jong ki lai tylli ki konstitwensi, ka 13-Mawryngkneng, 24-Mawphlang bad ka 47-Rajabala la shai ka sngi kin thep ia ka vote jong ki ban jied ia ki MLA thymmai ban mih khmat sha ka iing dorbar thawain ka jylla.
Ha 13-Mawryngkneng konstitwensi ki don san ngut ki kyrtong kiba don ha kane ka jingiakhun ia kane ka ilekshon MLA shiteng samoi, ha 24-Mawphlang ki don lai ngut , ha 47-Rajabala ki don san ngut, baroh ki kyrtong kiba ia khun ki don 13 ngut.
Na ka liang jong ka tnad elelction kala pynkhreh bha bad pynbiang ia ki pulit ban peit ba ka ilekshon kan long kaba iaid beit, khamtam hapoh Rajabala ha dien ba kala mih ka jingiashong hapdeng ki nongkyrshan ka NPP bad ki nongkyrshan ka Congress.
Ki ophisar ba dei pyniaid iaki polling station kila poi lut sha ki jaka bala buh ban pynlong ia ka jingiathep vote la shai ka sngi ka ban sdang ha ka por 7.00 baje mynstep bad kan kut ha ka por 4.00 baje noh phai sngi.
