Shillong, Kyllalyngkot 13: U bah Thomas Passah u trai jong ka Meghalaya Security Agency u la ong ba katkum ka jingpynbna ka sorkar na ka tnad District Council Affair, ha ka 24 tarik bnai Jylliew 2015, kala kren shai ba ki bym dei ki riewlum haba ki thep tender ym don kam ia ka Trading Licence, hynrei lada kila shah jied pat kin hap ban ai ia ka Trading Licence kaba ki hap ban ioh na ki District Council ban sdang ia ka jingtrei.
Haba kren ha ki lat pathai khubor mynta ka sngi ka 13 Tarik Kyllalyngkot 2026 la ong ba kila thoh pyrshah ia kane hynrei haduh mynta kane ka jingthoh jong ka sorkar ka dang ieng bad halor kane ka Khasi Hills Autonomous District Council ka ai ia ka Trading Licence sha kito ki briew kiba na bar ka jylla kiba ioh ia ki jingtrei kontrak.
Katkum ka United Khasi-Jaintia Hills District (Trading by Non Tribals) Regulation, 1954, ki don hynniew tylli ki kyndon hato yn ai, ne yn nai ai ia ka Trading Linces sha ki bar jylla ,kawei na kitei ki kyndon ka long ka kyndon 3A, kaba dei ha ka kyndon (b) ka ong hato don ne em ki riewlum kiba la trei ia ka juh ka kam lane ki kloi ne em ban trei ia kata ka juh ka kam kaba u bar jylla u apply ban ioh trading licence ban trei ia kata ka kam.
U Bah Thomas u la ong ba katei ka jingpynbna sorkar ha u snem 2015 bad kaei kaba ka District Council ka ai Trading Licence ia kiba la ioh ia ka kam ban trei kontrak, kane ka kren shai ba ka ain ka United Khasi-Jaintia Hills District (Trading by Non Tribals) Regulation, 1954 kam don jngmut shuh kane ka ain.
