Shillong, Risaw 22: U Lat jong ka jylla u Tathagata Roy mynta ka sngi u la leit ban jngoh ia ka met jong u Archbishop Rev Dominic Jala kaba la buh ha iing mane bah ha Laitumkhrah ban burom ia une u riew niam u ba la khlad ha ka jingiatyngkhuh kali ha America.
Ha kane ka jingleit sngewlem na ka liang jong u Lat ka jylla u la ioh ban ia kren ruh bad kiba ha iing jong u Archbishop bad ka para khatduh kaba la don hapoh iing mane bah ha kane ka por. Na ka liang jongu Lat ka jylla u la pynpaw ia ka jingsngewlem jong u bad u duwai na ka bynta ka mynsiem ba la khlad ban ioh ia ka jingjahthiat bymjuh kut.
Ha kane ka jingleit ia u Lat la synranlang da u myntri khynnah ba rim jong ka sorkar pdeng u KJ Alphons, u myntri ka tnad ka koit ka khiah u Bah AL hek. Ha kane ka jingwan la ia kynduh ruh ia u Bishop Rev Victor Lyngdoh u ba la don lang ha kane ka por ha iing mane bah.
Ha kane ka sngi na ka liang jong ki nongialam seng sain pyrthei na ki party bapher bapher kila leit ban leh burom khatduh ia u Archbishop mynta ka sngi ia kaba yn sa pyndep ia ka jingtep don burom la shai ka sngi ha iing mane bah Laitumkhrah.
