Shillong, Nailur 05: Ki nongialam ka Confederation of Ri Bhoi People (CoRP) tang mar ia ioh ia ka jingujor bad ka jingtip kaba thikna na ki katto katne ki Nongshong shnong ia ka jingdon kawei ka karkhana shna dawai lane Chemical shna rong ïing kaba la tip kyrteng kum ka Shri. Petro Chemical Mercantile Pvt.LTD ba kam don ia ki kot ki sla kiba biang.
Na ka liang jong ka seng CoRP ka la leit hiar sha katei ka karkhana ban jurip ia katei ka karkhana kumba la ujor,ha kane ka jignleit jurip la ialam da u u President Rangbah u Bah Bandari Ryntathiang, ka la hiar mynta ka sngi ka 5 tarik Nailur, 2023, sha katei ka karkhana kaba don ha ka shnong Narbong, Byrnihat Ri Bhoi District.
Kumta na ka liang ka seng lem bad da ki phew ngut ki dkhot jong ka, bad ki Nongshong shnong ha katei ka jingjurip ki la shem pynban ba ia katei ka karkhana la pyntrei kam khlem da don ki kot ki sla kiba biang.
Tang mar ia lap ia katei ka jingshisha, katei ka seng ka la khang tala shi syndon bad ai por ia u trai katei ka karkhana shi bnai ba un pynbiang ia ki kot ki sla bad lada ym lah ban pynbiang ia ki kot ki sla katei ka karkhana kam dei shuh ban pyntreikam ne plie ia ka, naka liang jong ka seng kala shem ba ia kane ka karkhana la ong trai da u bah John Lapang, kumba la paw kyrteng.
