Shillong, Jymmang 03: katkum ka RTI kaba la ioh da ka HYC na KHADC la ong ba ha ki lai snem mynta, naduh u bnai Kyllalyngkot 2014 haduh u Risaw 2016 la shem ba kiba pan trading license napoh ka KHADC ki don haduh 475 tylli bad na kine ka KHADC kala dep ban ai haduh 450 tylli.
U Bah Robert K Jahrin General Secretary jong ka seng HYC, u la ong ba ha u bnai Risaw 2013 kala don ka jingpynbna ba la khang ia u Syiem jong ka Hima Mylliem ha kaba ia dei bad ka jingai trading license ia ki bar jylla ha Iewduh, hynrei ia kane la weng noh da ka KHADC ha u snem 2015 da ka jingweng ia ka jingpynbna la ai bor biang ia u Syiem ka Hima Mylliem ban ai NOC ia ki bar jylla ban ioh ia ka trading license.
La ong ba ha dien ba ka HYC kala ioh ia kane ka RTI, kala leit ban ia kynduh ia u CEM jong ka KHADC u Bah PN Syiem ban kylli halor kane ka jingkiew syndet ki nongioh ia ka trading license, ha kane ka jingiakren na ka liang jong u CEM u la ai ka jingkular bay n sa peit ia kane ka kam hynrei haduh mynta la palat lai taiew ym pat leh ei ei.
Ka KHADC kala ioh ia ka jinglum pisa haduh T.39, 46, 51, 140 klur na ka bai trading license naduh u snem 2005 haduh 2016. Na ka liang jong ka HYC kala kynnoh ba ha dien ba kane ka PDF kala wan ha ka bor ka la don ka jingai trading license kulmar. Na ka liang jong ka HYC ka shim ba kane ka jingkiew jong ka jingioh lum pisa na ka trading license ka dei na ka jingai kulmar ia ka trading license.
Ka HYC ka ai jingmut ba shuwa ban ai NOC sha ki bym dei ki trai jylla dei ban ia kren ha ki dorbar shnong ba kin ia ai jingmut ha kaba ia dei bad kane ka kam. Ka HYC ka dawa ba dei ban pynkylla ia ki kyndon ha kaba ia dei bad ka jingai ia ka trading license hapoh jong ka KHADC.
