New Delhi, Jymmang 01: Ka Cabinet Committee on Political Affairs ba la pyniaid da u Myntri Rangbah duh Narendra Modi ka la shim ia ka rai ban pynrung ia ka jingkhein ia ki caste ha ka khanasamari ka ban sa long shen. Kane ka pyni ba ka sorkar kaba mynta ka shimkhiaia ki jingmyntoi bad ki jinglong ba pura jong ka ri bad ka imlang sahlang.
Katkum ka Article 246 jong ka RitiSynshar ka Ri India, ka Census ka dei ka kam kaba hap hapoh ka jingpeit jong ka Sorkar Pdeng kaba don ha ka bynta kaba 69 jong ka Union List ha ka Seventh Schedule.
Katba ki don ki jylla kiba la pynlong ia ki jingwad bniah ban khein ia ki briew, kine ki jingwad bniah ki la iapher ha ka jingshai bad ka jingthmu, ha kaba don kiba la pynlong tang na ka liang ka sain pyrthei, kaba la pynmih ia ka jingartatien ha ka imlang sahlang.
Da kaba pyrkhat ia kine ki jinglong baroh, bad ban pynthikna ba ka imlang sahlang jong ngi kan ym wan hapoh ka jingpynbor jong ka sain pyrthei, la rai ba dei ban pynrung ia ka jingkheinia ki caste ha ka jingkhein briew kaba kongsan ha ka jaka ban pynlong kum ka jingwad bniah kaba kyrpang.
Kane kan pynthikna ba ka imlang sahlang kan nang khlain ha ka liang ka ioh ka kot bad ka imlang sahlang, bad ka jingkiew shaphrang jong ka ri kan iai bteng khlem jingkhanglad.
Ka long kaba sngewtynnad ba haba la buh ia ka kyndon ban buh kyrpang 10 percent na ka bynta ka imlang sahlang kaba kham tlot ha ka ioh ka kot, kam shym la pynmih ia ka jingeh ha kanokano ka bynta jong ka imlang sahlang.
La weng noh ia ka jingkhein ia ki caste na baroh ki jingkhein briew ba la pynlong naduh ba la ioh ia ka jinglaitluid. Ha u snem 2010, u Myntri Rangbah duh ha katei ka por u (L) Dr.Manmohan Singh u la pynthikna ha Lok Sabha ba ia ka bynta jong ka jingkhein ia ki caste yn sa pyrkhat da ka Kynhun Myntri.
La thaw ia ka kynhun ki Myntri ban ia pyrkhat ia kane ka phang, bad kiba bun ki seng sain pyrthei ki la ai jingmut ban pynlong ia ka jingkhein jaitbynriew. Wat hapdeng kane, ka sorkarbarim ka la jied da ka jingjurip ha ka jaka jong ka jingkheiñia ki caste, kaba la tip kum ka Socio-Economic and Caste Census (SECC).
