Shillong, Risaw 13: Ka KSU ha ka 9 tarik u Risaw 2023 ka la ai da ka dorkhas sha u Chief Engineer ka PWD Roads ban pynpaw ia ka jingpyrshah halor ka jingtei pandal na ka bynta ban leh niam Puja ha surok ba dei peit jong ka PWD namar kane ka wanrah ia ka jingkhapniah, jingdheng kali bad ka jingbym sngewtynnad ban iaid lyngba ki pandal ia ki bym shim dei niam Hindu.
Ha kaba iadei bad kane ka bynta na ka liang jong ka Office jong ka Deputy Commissioner, ba la lam khmat da ka kong D. Kharshiing iba dei peit ia ki thaiñ Laban ila khot ka jingialang kaba kyrkieh ha 13 tarik u Risaw, 2023 ha Laban Police Station.
Ha kane ka jingialang ba la lam khmat da ka kong D. Kharshiing ladon ki nongialam jong ka Laban Puja Committee bad Central Puja Committee, ki nongialam Shnong jong ka Dorbar Shnong Laban, ki members jong ka Office PWD, u Officer In-Charge jong ka Laban Police Station u N. Khan bad ki nongialam jong ka KSU Laban Circle ba la lamkhmat da u President Reuben Najiar bad u General Secretary Jason Laloo.
Ha kane ka jingialang na ka liang ka KSU Laban Circle ka la pynsngew ia ka jingujor ka jong ki halor ka jingbym iahap ban shna bad kyntiew pandal nalor ka surok PWD ba pyndonkam lut ki paidbah.
Na ka liang jong ka Laban Puja Committee ka la mynjur ia ka jingai jingmut jong ka Seng ba nym shna shuh ia ki Pandal ha ki surok bad shuh shuh ki la kular ruh ban pynbun ia ki volunteers ki jong ki ba ka nym pynkhapniah ia ka surok ka synkein bad ban peit ban khmih ba ka jingleh niam kan iaid beit iaid ryntih khlem pynthud iano iano ruh.
Na ka liang ka Seng kala bthah ia ki nongialam jong ka Puja Committee ba ka nyngkong ki dei ban peit ia ka jingkhuid ka jingsuba ha ki jaka lehniam ka jong ki bad ym dei ban Bret pathar ia ki nuit sha surok bad ha shnong ha thaw, ba kim dei ban pynheh jingrwai palat ban ia ka por ba lah buh na ka liang jong ka Deputy Commissioner.
Bad kaba kham kongsan ba kin batai ia ki para riewniam lyngba ki lad pathai khubor ne ha kano kano ka rukom kaba ki sngew dei ban leh ba ym bit ia ki riew lehniam ne ki paidbah ba wan peit ne leh Puja ba kin dih buaid bad pynhuri hura ha ki Shnong ki thaw ha ka por Puja.
Kane ka long ba ka Seng ka ju lap man ba dei Puja ba ki don katto katne ngut ki ba ju shim kabu ha ka por Puja ban iashoh iadat bad pynhuri hura ruh ha ki shong ki thaw bad kumjuh ruh bunsien ki aksiden ha ki por mynmiet ki ju jia man la kapor namar ka jingdih buaid palat ki briew ba wan Puja.
