Shillong, Jymmang 26: U Archbishop Victor Lyngdoh ka Jylla Niam Bah Shillong u la plie bad pynkhamti ia ka Parish Thymmai Mary Our Help Christian Mawpdang ha u Sohblei Sebastian Tirkey kum u Parish Priest bathymmai myn ha ka 26 tarik u Jymmang ha Mawpdang.
Katei ka parish kaba 43 ha ka Jylla Niam Bah Shillong kaba don ha New Shillong ia kaba la saindur ha ka rukom kaba kyrpang namar ki paidbah ki dei ki la pynkhreh bha ban pdiang ia ka Jingwan jong ka parish ia kaba la sakhi da ki hajar ngut ki paid u Blei ki la wan shim bynta
Ka Balang Mawpdang baroh shikatta ka hap ha Parish Sts Peter and Paul kumba 27 snem bad ka Iing Bishop ka la ibit ban ai parish.Hapdeng ka jingphyrnai jong ka bneng ki lyngdoh riewniam shynrang bad kynthei ki la ioh bynta ia ka mass Bakhuid.
U Sohblei Barnes Mawrie uba dei u lyngdoh synrop ka Mawpdang u la donlang kynthup ia u Sohblei Laurence Nongkseh u Parish priest ka Pynthorumkhrah parish, u Provincial ka Shillong Province’s u la donlang.
Ia katei ka Parish thymmai jong ka Mawpdang Our Help Christian kaba la kha na ka Parish Pynthorumkhrah Sts. Peter & Paul ka dei ka parish balai hadien ka Mawpat parish.
U Archbishop Victor Lyngdoh haba plie parish ha Mawpdang ia kaba la pynbna ba u Sohblei Sebastian Tirkey kum u Nongsharai Banyngkong ban peit ban jngoh ia katei ka parish.
U Archbishop Victor Lyngdoh kum u kongsan ha ka Mass Bakhuid ba la plie parish bad pynkhamti ryngkat ka pynkup bor katkum ka Iktiar jong ka Ain Canon jong ka Balang ha kaba u Archbishop Victor u la pynmynta ia ka jingleh nuam.
Haba plie ia ka parish thymmai u Archbishop u la ai bor ha u Sohblei Sebastian Tirkey da ka jingphla jingngeit jong ki Apostle, ka jingkular ban shakri ia u paid u Blei, ka jingdoh ieid ia ki saw tduh dong ka duwan, nangta la ialam sha ka khet jingphla bad ka jingai ia u Shabi jong ka Parish ha u Nongsharai Banyngkong.
Shuh shuh u Archbishop Victor Lyngdoh haba ai ia u Sohblei Sebastian Tirkey ia ka bor jong Balang u la jingbthah ia u Vicar General ka Jylla Niam bah Shillong u Sohblei Richard Manbha Majaw ban pynbna ia ki kyndon bad ki pud ki sam jong ka Parish thymmai kaba iatakhuh ia ki parish marjan kum ka Mawryngkneng, Mawpat, , Nongrah, bad ka Mawbri Parish.
Haba kut jong ka jingaiti ia ka jingplie parish u Archbishop Victor Lyngdoh u la ai ia ka Dulir ia kaba la shon muhor da u Archbishop bad ka jingsoi ia ki dulir. Ka jingplie Parish ha Mawpdang ka dei ka jingkylla jong ka por bad kaba don ka khanatang ha Jylla Niam Bah Shillong ha ka jingdon jong ki Parish priest na ki parish ba markhap.
Ka Mawpdang parish kan duh noh ia ka balang Mawkasiang bad ka la leit iasnoh sha ka Mawpat Parish bad ka Parish Mawbri ka ioh noh ia ki balang Shnong Mawkhanu Lumdiengngan Wahmyntait baroh shi katta la peit da ka Mawpat Parish.
Ka khanatang jong ka Balang Mawpdang ka dei kaba la dep 100 snem tam ha kaba ka Balang ka la poi ha u Snem 1917 da u Sohblei Vendrame, Sohblei Ussai, Sohblei C,l. Attard, u Sohblei Peter Schiavon parish ka Pynthorumkhrah kiba dei ki Mishonari na Shiliang duriaw. Bun Bah ki khanatang ym lah ban batai.
