New Delhi, Jylliew 16: U Myntri Kam Pohiing jong ka sorkar pdeng uba dei ruh u Myntri ka Tnad treilang u Amit Shah u la bishar bniah ia ka jingpynkhreh na ka bynta ka Khana Samari ka ban sa wan ryngkat bad u Home Secretary, u RG&CCI bad kiwei kiwei ki ophisar ha New Delhi, mynta ka sngi. Ia ka jingpynbna ban pynlong ia ka Khana Samari yn sa pynmih ha ka kot ai khubor jong ka Sorkar ha ka 16 tarik Jylliew, 2025.
Ia kane ka Khana Samari yn pynlong ha ki ar bynta. Ha ka bynta ba nyngkong kata ka House Listing Operation (HLO), yn lum ia ki jinglong jingman jong ka iing, ki jingdon jingem bad ki jingdonkam jong kawei pa kawei ka iing.
Hadien kata, ha ka bynta kaba ar kata ka Population Enumeration (PE), yn lum ia ki jingtip shaphang ka jingbun briew, ka imlang sahlang, ka kolshor bad kiwei kiwei ki jingtip ba bniah jong uwei pa uwei u briew ha kawei pa kawei ka longiing. Ha ka Khanasamari yn peit ruh ia ka jingdon ki jaitbynriew bapher bapher.
Na ka bynta ki kam ba iadei bad ka Khana samari, yn pyntreikam ia kumba 34 lak ngut ki nongkhein bad ki nongpeit bad kumba 1.3 lak ngut ki nongtrei lum jingtip shaphang ka khana samari. Kane ka Khana Samari ka dei kaba 16 naduh ba la sdang bad kaba 8 hadien ba la ioh ia ka jinglaitluid.
Ia ka khanasamari ka ban long yn pynlong lyngba ki lad digital da kaba pyndonkam ia ki mobile application. Ka jingpynbiang ia ka jingai jingkheinialade ruh kan long kaba lah ban ioh da ki paidbah. Yn pynbiang ia ki lad jingiada ia ki data ban pynthikna ia ka jingshngain jong kane ka data ha ka por ba lum, pynpoi bad buh ia kine ki jingtip.
