Shillong, Risaw 09: Ka sorkar Meghalaya ha dien ba la ioh ia ka jingpyntip ba la lap ia ka met jong u bah Tiklu Jyrwa na Lumparing Shillong ha ka jingshah ban ha ka jingtwa u Lum thah ha Uttarkashi ka sorkar kala shim khia ban ia kren bad ka sorkar Uttarakhan ban pynpoi ia ka met sha Shillong.
Ia ka met u bah Tiklu Jyrwa yn pynkit da eroplane sha Guwahati bad la khmih lynti ba kan poi sha Guwahati por saw baje ei ei jan miet bad mynta ka miet yn sa lah ban pynpoi ia ka met sha Shillong ha iing sah jong u ha Lumparing, Shillong.
Ka Nehru Institute of Mountaineering Uttarkashi kala pyntip ha ka sngi sait jain ba la lah ban sei sa hynniew tylli ki met jong kiba khlad bad kawei na kita ka dei ka jong u bah Tiklu Jyrwa, na ki 29 ngut haduh ka 8/10/2022 la lah ban sei 26 tylli ki met kiba dang sah long sa 3 ngut.
U Myntri Rangbah ka jylla u Conrad K Sangma u la ong ba na ka liang jong ka sorkar kala iakren bad kiba ha iing ha sem bad kala shim ia baroh ki lat ki lynti ruh ban wan ia ka met u bah Tiklu Jyrwa sha la iing jong u ha Lumparing.
Na ka liang jong kiba ha iing ha sem ki pynpaw ia ka jingsngewnguh ka jong ki ia ka sorkar kaba la shim khia ban wanrah ia ka met u sha Shillong na katei ka jaka kaba la jia ka jingjia kaba sngewsih.
