Shillong, Rymphang 04: Na ka daw jong ka jingiakynad jaidbynriew kala ktah ia ka iew kwah ha South West Garo Hills District ia ki nongrep kiba wan die kwai bad ia ki nongkhaii kiba wan thied kwai.
Ban rah biang ia ka jingshong shngian ki bor ba dei peit ka SWGH district kila lum ia ka jingialang ha ka 2/2/2026 ha Ampati ha ka jingiadon lang ki Nokma Council, ki nongialam niam na ki kynhun bapher bapher, ki seng bhalang, kiriew rangbah, ka kommittee ba peit ia ka iew ha ka jingdon lang ki nongrep bad ki nongthied.
Ha kane ka jingialang baroh ki nongkren kila pynpaw ia ka jingsngewkhia na ka bynta kiba rep kwai bad ha ka juh ka por kwah ba kan don ka jingshong suk shong sain ha ka dong bad ka thain bad ha ka juh ka por dei ban sngewthuh ia ka jingsngew jong ki briew ha katei ka thain.
Ka jingjia kaba dang shen ha shnong Goalgaon ha Rajabala, dei na kane kaba la wan rah ia ka jingshong syier, ia kane ka jingjia baroh ki pynremkur bad kwah babn wanrah biang ia ka jingshong suk ha ka thain, ka jingia shong sah lang kala long naduh ki por ba rim, hynrei katto katne ki riew sniew kala pynthud ia ka shongsuk shongsain.
Haba kren ha ka jingialang ka Deputy Commissioner, South West Garo Hills, ka Anendya Raajsshre, IAS, kala ong ba kane ka jaka la tip ba ka don ha ka jingsuk bad ka jingiaim lang wat la ki don ha la ka jong ka rukom ngeit niam, ka kyntu ia baroh ban pynneh pynsah ia ka shnongsuk bad ym dei ban shim ia ka ain ha kti.
Na ka liang jong ki bor jong ka West Garo Hills District ki ia kynduh na ka por sha ka por bad ki bor ba dei peit ia ka South Salman District ka jylla Assam bad la kyntu ia ki nongkhaii ba kin long kiba jai jai bad iai shah.
U Superintendent ki pulit u Vikash Varma, IPS, u da kyrpad ia ki paidbah nongshnong shnong ba kin pynneh ia ka shong suk shongsain bad kin da pynshisha ia kaei kaba mih ha ki lat pathai khubor bad la don kano kano pyntip sha ki pulit ha kano kano ka jaka kaba don eh bad ki ha ka jaka ba kin shim hi ia ka ain ha kti.
