Shillong, rymphang 21: U Bah HS Shylla haba ia kren halor Zero Hours Notice kaba la wanrah da ka kong TS Thangkhiew hapoh iing dorbar jong ka KHADC u la ong “ Nga long u briew u ba don palat ban ioh poi biang ha kane ka iing dorbar ban ioh ban pynshai ia kane ka kam, u la ong ba hapoh Facebook, ha ka sur hynniewtrep, la ong ba dei ban siat iap ia nga, mynshuwa ki lehnoh kila wan ha duh iing jong nga, hynrei da ka jingdon ki pulit kam shym la jia ei ei, halor kane ka jingbyrngem nga la pyntip sha u Superintendent ki pulit bad sha u Deputy Commissioner ba la don ba byrngem ban siat iap ia nga”. La ong u Bah Shylla.
U Bah Shylla u ong, “nga kyrshan wan ban rah resolution ha District Council bad ha Assembly, ba ka Executive Committee lane ka Cabinet ban khang syndon ia kane ka kam tih Uranium, nga kyrshan ruh ia ka jingdawa tohkit CBI, halor ka No Objection Certficate ngam kynmaw, shim beit ba la ai, ka NOC ba la ai ka long tang shisnem 2007-2008 bad ha dien kata la dei ban pynthymmai.”
Halor ka Memorandum of Understanding (MoU) ia ka surok kaba 20 Km na Wahkaji sha Mawthabah, ka dei ka jingkwah surok jong ki paidbah namar ki paidbah kila poi ha ka jingeh ha ka leit ka wan, ka sorkar ka don T.20 klur ban shna surok , ngan ia thuh ia kaei kaba jia ha kato ka por, u Lat ka jylla u M M Jacob ha kato ka por u la khot ha kaba u la ong, balei phim shna ia ka surok, ka UCIL kan ai pisa lada ioh ne ym ioh tih uranium dei ban shna ia ka surok, ka bynta ban tih ne ym tih uranium ka shong ha ka sorkar jylla bad ha ka 01.08.2016 ka sorkar kala rai ban nym ai jaka shuh ia ka UCIL”.
Haba ia dei bad ka jingong bym don kot don sla u Bah Shylla u la kam ba ka District Council ka don lut ia ki kot ki sla haba ia dei bad kane ka kam, mano ba ong ym don kot don sla shuh. U Bah Shylla u la ong ba “ Ka CBI kan nym trewh shuh ban tohkit ia nga, namar la shah ha ka jingtohkit ka CBI ha kaba ia dei bad ka T.19.88 klur ha u snem 2006”.
Haba ia dei bad ka jingthep pisa ha kaba ia dei bad ka Joint Account, ha kaba la soi da u AC Kundu jong ka UCIL ha kato ka por ba du Bah A Shangpliang bad kaei kaba ka KHADC kaioh ka long ia ka 2% service charge kato ka pisa ka rung sha ka Account jong ka Council, palat ia kata kila wan sha kiwei ki CEM, u Bah CB Syiem, Dr C Lyngdoh, Bah PN Syiem CEM ba mynta, u Bah Manstudy Nongrem, Bah Ardent M Basaiawmoit, bah Adelbert Nongrum bad mynta biang u Bah PN Syiem”.
U Bah Shylla u la kam “ ha ka por jong nga ka pisa kala poi T.5 klur ha ka Joint Account ban sdang ia ka kam, ha dien jong nga kala kot sha ka 36 klur bad kaba sah ha kiwei ka long T.31 klur, sei ia ka snam mano ba kham ieit jaidbynriew” .
