Shillong, Naiwieng 21: U Bah Latiplang Kharkongkor kyrtong CEM bala pynieng da ka United Democratic Forum (UDF) kaba kyntup ia ka Congress, lai ngut ki MDC NPP, ki kdkhot shimet ha dien ba la dep ban bishar bniah ia ki kot thep kyrteng da u Secretary ka Legislative jong ka KHADC, u la iathuh ba ia u la pynieng da ka UDF.
Haba kren ha ki lad pathai khubor ha dien bala dep ka jingbisahr bniah ia ki kot thep kyrteng, u Bah Latiplang u la ong ba kum ki MDC kila ia shong mynnin ka miet ia ka jingialang bad ki la jied ia u ban long u nongialam jong ka Parliamentary Party ka UDF bad mynta ka sngi kila wan ban thep ia ka nomination ban ia khun ia ka ilekshon CEM ka ban long la shai ka sngi kumba la pynbna da u lamphang ka iing dorbar mynnin.
Haba jubab ia ki jingkylli u kyrtong CEM na ka liang jong ka UDF, u Bah Latiplang u la ong “Nga sngewskhem ban jop namar tang mynnin la iohi ba u Chairman u la don lypa ha ka liang jong ngi, ka jingjop kan dei ka jong ngi”. Haba ia dei bad kiwei ki para MDC, u bah Latiplang u la ong ba ka jingkhang ka plie na ka bynta kito ki ba kwah ban pyniasoh bad kane ka kynhun UDF.
Na ka liang jong u bah Charles Marngar secretary jong ka UDF, ba dei MDC jong ka Congress u la ong ba na ka liang jong ka party Congress kala ai ka jingshaniah ia u Bah Latiplang ban long u kyrtong CEM namar u dei u ba la jop bun sien bad u la tip bha ia ka kam.
Kumban shu kdew hangne ba u bah Latiplang Kharkongor u dei u MDC ba la jop saw sien lynter na ka Nongthymmai Konstitwensi naduh u snem 2004 ter ter haduh ka 2019 mynta u snem u la jop na katei ka juh ka kala bad ha kine ki snem u la long u EM ha ki EC kiba bun, kum ka tnad khaii bad ka tnad ba dei peit ia ka khyndew ka shyiap bad kum ka party kala ai ka jingshaniah ban long u nongialam.
