Shillong, Kyllalyngkot 21: Ia ka jingrakhe ia ka sngi bala ioh ia ka jylla Meghalaya mynta u snem 2026 la pynlong ha South Garo Hills District, ha kaba ka jylla kala kynjoh sha ka 54 snem ka rta jong ka, ha kaba u myntri rangbah ka jylla u Conrad K Sangma la long u kogsan ha ka jingdon lang u symbut myntri rangbah ka jylla u bah Prestone Tynsong, myntri cabinet u bah Lahkmen Rymbui, ki MLA ki MDC bad ki heh sorkar kynthup ia u Chief Secretary ka jylla u Dr. Shakil P. Ahammed.
Mynta ka sngi ka 21 Tarik kyllalyngkot 2026, ha kren ha kane ka jingrakhe ia ka sngi ba ioh ia ka jylla ba pura hakum kane ka sngi sanphew saw snem mynshuwa ha kaba u la pynkynmaw ba kumno ki nongialam ha kato ka por kila pynioh ia ka jylla da ka jingialeh kaba jai jai.
Kane ka dei ka jingkyrkhu ba la ioh ia la ka jong ka jylla la ka jong ban pynneh pynsah ia la ka jong ka jinglong tynrai, ha kane ka sngi u myntri rangbah u la pynpaw ia ka jingsngewnguh ia kito ki nongialam kiba la pynioh ia ka jylla bapura, la ong ba wat la ia pher kum ka jaidbynriew hynrei ia tylli kawei ban pynpoi sha kathong.
U myntri rangbah ka jylla u la pynpaw ia ka jingsngewkhia jur ia kaei kaba mih ha ki Social Media kiba wanrah ia ka jingpyniapher jaid bynriew kaba u da sngew thut bha ia kum kine ki jingleh, bun sien ki wanrah ia ki jingiashun bad kine ki jingleh ka long ba ki klet ia ka jingia treilang ki nongialam kiba mynshuwa.
Ha kane ka sngi u myntri rangbah la ong ba ha kine ki khyndiat snem ka jylla Meghalaya kala dang paw ha ki kam pynroi, u la ong ba kaei kaba u kwah ban iohi ba kaei kaba ka sorkar ka leh ki paidbah ki dei ban ioh jingmytoi. Ha kane ka sngi la ioh ruh ia ki jingshad tynrai jong ka jylla.
