Shillong, Iaiong 05: U Rakkam A Sangma u MLA ka National People Party u myntri ba dei peit ia ka tnad pule puthi ka sorkar jylla u la ong ba ka jingpass bha ki khynnah ha ka exam SSLC ka dei na ka jingiarap ka kot iarap CM Impact.
Ïa kane Rakkam A Sangma u la pynpaw hadien ba ka Meghalaya Board of School Education (MBoSE) Ka la pynbna ia ka result jong ka Secondary School Leaving Certificate ha kaba ka jingpass jong ki khynnah pule ha kane ka kynti ka kiew bha haba ianujor bad ki snem ba la dep.
Kum ban shu kdew hangne, Ki khynnah kiba ialeh ia SSLC Exam ki don 63,682 ngut. Na kine ki 55,473 ngut ki ba pass, 22,726 ngut ki dei ki shynrang bad 32,747 ki khynnah kynthei bad haba kheiñ percentage ia ka jingpass ki khynnah ha u snem 2025 ka long 87.10%.
U Rakkam A Sangma haba kren sha ki nongthoh khubor u la kam ba ka jinglah ban pynmih ia ka CM Impact Guidbook ka ba dei ka kot iarap ka la kyntiew bad ka la iarap shibun ia ki skul, ki jaka pule ha ka rukom ai jinghikai.
U Rakkam A Sangma u la ai khublei ia baroh ki khynnah ki ba la pass ha kane ka exams bad u la ai mynsiem ruh ia kito ki ba ym lah ban pass ha kane ka exam bad u la ong ba kane ka exam ka long ka ba jwat ban iakhun hynrwi ymdei ban duh mynsiem.
la ong kan don ka lad ba kin ioh biang ban ialeh exam biang, kaba la tip kum ka Suplimentary Exam ka ban sa long ha ka taïew bakhatduh jong u bnai April lane ha ka taïew ba sdang u bnai May ba kin ioh biang ka lad ban leh bha bad ba kin lah ban jop ha ka jingiakhun jongki.
