Shillong, Lber 16: U Myntri Rangbah ka jylla u Conrad K Sangma mynta ka sngi u la wanrah ia ka rai hapoh ka iing dorbar ban dawa na ka sorkar pdeng ba dei ban pynlait ia ka jylla Meghalaya baroh kawei na ka jingpyntrei kam ia ka Citizenship (Amendment) Act 2019.
Ha dien ka jingiatai nia hapoh ka iing dorbar, ka iing dorbar kala dpiang ia katei ka rai kaba la wanrah da ka sorkar ban dawa na ka sorkar pdeng ba ia ka CAA dei ban pynlait na ka jylla Meghalaya.
U mytnri rangbah ka jylla u Cornad K Sangma haba pynshai ia ka jingkren ki dkhot ka iing dorbar ha kaba ia dei bad kane ka rai kaba la wanrah da ka sorkar u la batai ba katkum ka CAA ki jaka kiba don ia ka ILP, ki District Council kin lait na ka CAA.
Haba phai sha ka jylla Meghalaya u la ong ba wat la jan baroh kawei ka jylla kala lait na ka CAA, hynrei ki don ki jaka kiba la tip kum ka European Ward ha kane ka nongbah Shillong kito ki long ka Wards Commissioner 7,8,9 bad 10 kine ki lait na ka CAA, dei hangne ba ka sorkar ka kwah ban dawa na ka sorkar pdeng ba ia ka jylla baroh kawei dei ban pynlait na ka jingtrei kam ka CAA.
U Myntri rangbah u la ong ba kane ka CAA, ka long ban ai ka jinglong trai shnong kito kiba la dep ban wan sha India ha ka por ba phiah ia ka Ri India, ha ka por ba ioh ia ka jylla, kam dei ia ki ban dang wan rung thymmai kita kiba wan ruh ka dei bna long shuwa ka 31/12/2014.
La iathuh hapoh ka iing ba naduh ba pyntrei kam ia ka CAA ha ka Ri India, ha Meghalaya haduh mynta ym pat don u wei ruh ban wan pan ban ithuh kum ki nongshong shnong, la ong ba ka CAA ka khlem khot ia ki briew ban wan shong shnong.
U myntri rangbah u la ong ba yn nym lah ban ong ia ka sorkar pdeng ban weng noh ia ki ain kiba lala pdiang na ka liang jong ka jylla, hynrei kaei kaba ka jylla ka lah ban pan na ka sorkar pdeng ka long ban pynlait ia ka jylla baroh kawei na ka jingpyntrei kam ia ka CAA.
Ki dkhot ka iing dorbar kiba la ia shim bynta ha kane ka jingiakren halor kane ka rai jong ka sorkar ki long u Dr Mukul Sangma nongialam ka liang pyrshah, ha ka jingkren jong u nongialam ka liang pyrshah u la ong ba ki paidbah jong ka jylla kim kwah ia ka CAA.
Khlem kdew ia ka party, hynrei u nongialam ka liang pyrshah u la ong ba ka party kaba don ha ka bor synshar ha Delhi ka ialeh ban phiah ia ki briew jong ka jylla shatei lam mih ngi jong ka Ri India. Dei hangne ba ki seng riewlum ki sa mih bad ha ki por ban wan ki seng riewlum kin dang khlain shuh shuh. U la ong ba dei ban dawa na ka sorkar pdeng ba dei ban weng ia ka CAA.
Kiwei kiba la ia shim bynta ha kane ka jingiakren mynta ka sngi ki long ka Dr Ampareen Lyngdoh,Meralborn Syiem, Kimfa Marbaniang, Zenith M Sangma na ka liang pyrshah bad u bah Adelbert Nongrum bad u bah Sanbor Shullai na ka liang synshar.
