Shillong, Risaw 26: U NDC barim jong
ka Nartiang u Bah Hilarius Dkhar mynta ka sngi u la pyniasoh ia la de bad ka National People’s Party (NPP) ia kaba la pdiang burom da u Dr, W R Kharluki ba dei u president jong ka party hapoh jong kane ka jylla, ha kaba la don lang u Bah Octomewot Lamin, President NPP jong ka Jaintia Hills District, U James Sangma, MLA, u Bah Wailad Miki Shylla bad kiwei ki nongkit kam jong ka party.
Ha ka jingkren jong u Dr. W R Kharluki u la pdiang sngewbha ia u Bah Hilarius sha ka party NPP bad la thung ia u ruh kum u Working President jong ka Jaintia Hills District. La ong ba u myntri ba rim jong ka sorkar jylla u Bah Oliver Neat Shyrmang bad u Prof Don Kupar War, President barim jong ka jong ka Congress Shillong City ruh kila pyniasoh bad ka NPP, u bah Diverland Lyngdoh u la pdiang burom ia u Bah Hilarius sha ka Party.
Na ka liang jong u James K Sangma u la ong ba ka jingwan jong u Bah Hilarius sha ka party kan dang pynkhlain shuh shuh ia ka party NPP ha Jiantia Hills, u la ai khublei ruh ia ka jingpynsngew ka jong u ba u don ka jingshaniah ha ka jingialam jong u Conrad ka Sangma kum u president. Ka jingkhublei ka long ruh ia u Bah O N Shyrmang bad ia u d Prof. Don Kupar War kiba la rung sha ka NPP.
Ha ka jingkren jong u Bah Hilarius u la pynpaw ia ka jingsngew kmen ba ka party kala pdiang ia u bad kum juh ia ka jingshaniah kaba kala ai ha u ban long u Working president hapoh jong ka Party ha Jiantia Hills District bad u la ong ba un trei shitom na ka bynta ka jingjop jong ka party.
