Jowai, NNaiwieng 24: Mynta ka sngi ka seng Khasi Jaiñtia National Union (KJNU), hapoh ka jingïalam u samla Niman Shadap bad u samla Chemi Phawa ka la leit ban ïa kynduh bad ai dorkhas ha u Chief Executive Member jong ka JHADC u ma Thombor Shiwat, ba ka District Council kam dei da lei lei ban ai trading licenses ïa ka Kharkhana pynmih dewbilat ka Star Cement ban pynïaid ïa ki kali kitmar ne ki trok jong ka.
Na ka liang ki nongïalam jong ka seng ki la ban jur ïa ka Council ba kam dei ban ai ïa katei ka license sha ki bar jylla, namar lada ka council ka ai trading license ïa ki, te ki paradoh parasnam jong ngi pat shano kin leit, namar kane ka ktah ïa ka kamai kajih jong ki trai ri trai muluk kiba longtrai ïa ka khyndew ka shyiap katkum ka 6th Schedule kaba la pynkup bor hapoh ka jylla jong ngi, katkum ka paragraph 10 bad 11 ba la kdew shai ba ym dei ban ai trading licenses ïa ki non tribal ne ki bar jylla.
Na ka liang ka seng ka la maham jur ïa kito ki briew kiba thmu ban shim kabu ne ki benamy, ha ka ban pynïaid ïa ki trok jong katei ka kharkhana, namar kane ka ktah wat ïa ka pla tyngka jong ka Council. Na ka liang ka seng ka la ong ruh kan ym shong kli kti hynrei kan ïai buddien ïa kane ka kam, khnang ba ka jingmyntoi kan long ïa ngi ki trai jylla.
