Shillong, Lber 19: U Bah Sadon Blah ksiang jong ka HNLC haba kren ha ki lat pathai khubor mynta ka sngi la pyntip ba ka long ka sien kaba nyngkong ba ka seng HNLC kala shim ia ka rai ban phah ia u muktiar sha ka Tribunal bala thung da ka sorkar pdeng ban lait noh na ka jingshah khein beain.
U Bah Sadon la iathuh ba ka seng HNLC kala thung ia u muktiar bah Fernando Shangpliang ban leit ban ia sait ha khmat ka Tribunal ban pynlait ia ka seng na ka jingshah niew beain, la pynkynmaw ba ka sorkar pdeng kala pynbna kum ka seng beain dei ha u snem 2002.
La iathuh ba ha ka 22/3/2025 katei ka Tribunal kala khot ban shong bishar ia kaba la ai lat ia ka seng HNLC ban ia sait pyrshah ia katei ka jingshah niew beain bad kane ka dei ka sien kaba nyngkong ba ka seng HNLC ka long bala kloi ban phah ia u nongia sait ban pyrshah ia katei ka jingshah khien beain.
Ka seng HNLC kala ai da ka jingthoh bala thung ia u muktiar bah Fernando ha ka 6/Lber/2025 ban mih khmat ia ka seng sha ka Tribunal kaba la thaw da ka tnad kam poh iing ka sorkar pdeng ban iaid halor kane ka jingshah khien beain.
U bah Sadon la ong ba ka seng HNLC kala kwah ban ia kren ia suk bad dei halor kata ba kila wan sha ka jingiakren ia suk hynrei kane ka jingiakren ia seng ha ka kyrdan sain pyrthei kala pulom noh, hynrei ka HNLC kala shim ia kane ka lat lyngba ka ain ba ka seng HNLC ka kwah ia ka jingiakren ia suk.
Na ka liang jong u muktiar u bah Fernando u la pyntip ba u la pdiang ia kane ka jingthung jong ka seng ban long u kum u muktiar ban iaid na ka bynta ka seng ka ban long ka 22/3/2025 ha State Convention Centre Shillong bad u la kren ruh ba balei ka sorkar pdeng kala niew ia ka HNLC kum ka seng beain kata naduh 16/11/2019 haduh ka 30/06/2024.
Ia ka Tribunal la khlieh da u Jusitice Mitra Saikia, ki mamla ki ban leit sha kane ka Tribunal kin long na ka liang jong ka sorkar pdeng, ka sorkar jylla bad ha ka sien kaba nyngkong ba ka seng HNLC kan leit sha kane ka Tribunal lyngba u Muktiar u ba kala thung ban sait na ka bynta ka seng.
