Shillong, Risaw 05: Ka Khasi Students’
Union lyngba ka Environment and Cultural Cell ka la phah shithi sha u Myntri ba dei peit ïa ka Forest bad Environment bad ha ka juh ka sngi ruh kata ha ka 5tarik Risaw 2020 ka lah ïoh ruh ban ïa kynduh ïa ka Deputy Commissioner ka East Khasi Hills District, Kong I. Laloo (IAS) hadien ka jingplie noh ka sorkar ïa ki Ingmane bad ki jingleh niam jong baroh.
Ka Seng ka la leit ban rah ïa ka mat ha kaba iadei bad ka jingpynngam ïaki blei thaw bad ka jing pynjaboh iaki wah bad ki tyllong um. Hadien ba ka seng ha ki snem ba la leit ka la lap bad sakhi da la ki jong ki khmat iakane ka jingleh pathar kaba pynjaboh ym tang iaki wah hynrei kine ki rukom leh ki lah ban pynduh noh ruh wat ïa ki tyllong umbam umdih bad ia ka koit ka khiah.
Hadien ba ka seng ka lap ha ki snem kiba lah leit ïa ka jing bret pathar ïa ki blei-thaw ha ka tyllong umbam umdih ha Sanmer, Umkaliar bad ha kiwei de ki jaka bapher bapher ka la long ka jingpynjaboh ïa kine ki tyllong um bad kumjuh ïa ka mei mariang bad ka lah ban ktah shibun ïa ka koit ka khiah.
Ha kane ka jingiakynduh ka Seng ka la pynpaw ba ka jingpynngam lane bret ïa kine ki blei thaw ha ki wah ka buh jingma kaba khraw namar ka jingshna ia kine ka don iaki kynja rong kiba sniew bad kiba lah ruh ban long bih wat ïa ki tyllong um bam um dih bad ka lah ban pynsniew ïaka ki doh um doh wah bad ïa ka koit ka khiah jong ki paidbah.
Na ka liang jong ka Deputy Commissioner, ka lah pyntip ba kan sa don jingialang bad ka Central Puja Committee (CPC) ryngkat lem bad ka Meghalaya State Pollution Control Board (MPCB) bad kan sa rah ia kane ka mat kaba ka Union ka lah po pynsngew sha ki bor sorkar.
Shuh shuh ka seng lyngba ka Environment & Cultural Cell ka la pynpaw ruh ba wat ha ki snem kiba la dep ha ryngkat ka jingdon ki guidelines kiba la btah na ka Meghalaya State Pollution Control Board hynrei kam don pat ka lad ban pynthikna ba ki bud hok lane ka jingshimkhia na ki bor sorkar ban peitngor ïa kine baroh.
Kumta na ka liang ka Seng ka kren shai ba ka State Control Pollution Board kadei ban shimkhia ïa kane ka mat ha kane ka kynti kaba mynta ha baroh kawei ka jylla bad ka Seng ka khmih lynti ruh ïa ka jingshimkhia na ka liang jong ki District Administration baroh khnang ba kan ym ktah pat hadien ïa ki tyllong umbam umdih, ka jingkhuid jingsuba jong ka mei mariang sawdong sawkun jong kine ki tyllong um bad kumjuh ruh ia ka koit ka khiah jong ki paidbah.
