Shillong, Kyllalyngkot 25: Ka seng Synjuk Ki Nongsynshar Shnong Upper Shillong, kila phah da ka jingthoh sha u Myntri kam pynroi sor u Bah Ronie V Lyngdoh ban ong ia u myntri ba “ phila kular lehnoh shuwa ban kut mynta u bnai, ha kaba ia dei bad ki kam jong ka MUDA ki paidbah kila jynjar palat”. la ong u Bah Gilbert Laloo general Secretary ka SNSUP.
U bah Gilbert Laloo General Secretary jong ka sunjuk ryngkat bad ki rangbah shnong jong ka thain Upper Shillong kiba la ia don lang mynta ka sngi, haba kren ha ki lad pathai khubor ha Shillong Press Club la ong ba kila ai por haduh ka 30 tarik mynta u bnai ba u myntri un pynurlong ia ka jingkular ban pynlait ia ki shnong ki bymhap hapoh ka Shillong Municipal na ka MUDA.
Ka jingeh kaba ki ia kynduhmynta ki paidbah na ka thain Upper Shillong bad ka Lawsohtun ka long ba lada kim ioh ia ka “Occupancy Certificate” na ka MUDA kin lah ban ioh light, ka Um bad kim lah ruh ban leit shong hala ka jong ka iing, u Bah Laloo u la kynnoh ruh ban ioh ia katei ka certificate kim lah shuh ban sngewthuh namar lada lah ban ia kynduh myntri ka dor ka kham duna.
La ong ba ka MUDA kam lah ban shu tuklar ha kaba ia dei bad ka hok jong ki paidbah nongshong shnong, lada ka sorkar ka kwah ban leh ia kano kano kaba ktah ia ki paidbah kala dei ban pan jingmud na ki paidbah lada ki paidbah ki pdiang sa pyntrei kam bad lada kim pdiang ka dei ban pynsangeh.
La ong ba kum ka synjuk kila dep ban ia kynduh ia u myntri ha u snem ba la dep bad u la kular ban pynurlong ia ki jingdawa namar ka dei ka kam kaba ktah ia ki paidbah hynrei haduh mynta na ka liang jong u myntri ym shym la lah ban leh ei ei ruh dei na kane ka daw ba ka seng ka leit ban ai biang ia kane ka jingthoh bad ban ai por ia u myntri ba u dei ban leh ei ei noh hapoh ka 30 tarik mynta u bnai.
La ong ba lada u myntri ym lah ban leh ei ei hapoh kane ka por kaba la buh kum ka synjuk kan leit sha ki paidbah ban pan jingmud bad kumno ban leh ia kane ka kam. Kane ka jingpan ia ka Occupancy certificate kam dei tang ha kane ka thain Upper Shillong leh se ka dei sha kiwei ki jaka ruh bym hap hapoh ka Municipal.
