Shillong, Jymmang 07 : U Bah PT Sawkmie, MLA barim kum u Kongsan ha ka sngi Hatmajai ka 06 tarik u Jymmang, 2025 u la kyntiew ia ka lama plie pyrda kum shi bynta jong ka jingrakhe dap 25 snem ka Jubilee Rupa jong ka Savio Evening Secondary School, Mawlai Phudmuri.
La sdang ia ka prokram da ka jingduwai phirat na Phadar Jose Varickaseril ha ka jingdon ryngkat phadar Telesphorus Nonglang jong ka Mawlai Parish, kiwei ki phadar, ki nonghikai bad ki khynnah skul.
Ha ka prokram kaba la pynlong ha Mawlai Parish Hall ka principal kong E. Susngi ka la iathuh ba la plie nyngkong ia kane ka skul janmiet ha ka 8 tarik u Lber, 2000.
Ka thong ka long ba pynduna ia ki khynnah kiba ieh skul shiteng por, bad kumjuh na ka bynta kiba bylla mynsngi ba kin ioh pat ia ka kabu ban leit skul ha ka por janmiet.Ka la iathuh ruh ba la seng ia ka da u Phadar Gervasis ryngkat ka jingiarap lang jong i (L) John Durong.
Katba na ka liang u bah Sawkmie u la kyntu ia ki khynnah pule ba kim dei ban don ia ka jingsngewpoh ne jingsngew shah ieh beiñ namar baroh ki ia ryngkat kyrdan ha khmat U Blei.
U pynpaw ruh ba ha ka jingim kam don ka short cut ne ka lynti balyngkot, hynrei ban long ki nongjop ha ka jingim hap ban kiew na uwei u mawkyndon sha uwei pat. U la banjur ia ki khynnah ba kin long barabor kiba trei shitom ban ioh kheit ia u soh uba thiang ha ka jingim ka jong ki.
Ka Savio Evening Secondary School ka la pynpaw ba kam lah ban klet ia ki jingnohsynniang jong u bah PT Sawkmie ha ka por ba u long kum u MLA bad Myntri sorkar, kumta haba ia dei bad kane ka la ai khublei bad pynpaw ia ka jingsngewnguh na ka bynta jong u.Ha kane ka sngi la ioh ruh ia ki kyntien ai khublei na bah Donald Malngiang, vice principal ka skul.
