Shillong, Naiwieng 12: Mynta ka sngi u bah Titosstawel Chyne Chief Executive Member jong ka KHADC la plie ia ka jaka jngohkai pyrthei kaba nyngkong hapoh ka shong Maraikaphone kaba don ha Sohra, ia kaba la shna pynbha da ka jingbeit pisa na ka KHADC kaba la kot sha ka T.2.85 klur tyngka.
Haba kren kum u kongsan ha kane ka sngi plie u bah Titosstarwell la iathuh ba la sdang ia kane ka jingtrei ha u snem 2019 ha kaba ka KHADC kala bei pisa T.1 klur , ha dien kata la mang pisa biang T.1.2 klur, haba la trei ym pat dap la mang pisa biang sa T.50 lak bad khatduh la mang pisa sa T.15 lak tyngka.
U CEM u la ong ba ia kane ka jaka jngohkai pyrthei kaba la tip ka, Riat Nohkhlieh View Point la pynshna da ka KHADC ka dei halor ka jingiateh kular hapdeng ka shnong Maraikaphone bad ka KHADC ba na ka bynta ki shiphew snem ka jingmih kin ia sam 65% kan ioh ka KHADC bad 35 ka shnong.
La iathuh ba ha dien kata tei ka shiphew snem, na ka bynta san snem ka shnong ka ioh 65% bad ka KHADC kan ioh 35% na ka jingmih na katei ka jaka bad ha dien 15 snem ia katei ka jaka yn aiti noh sha ka shnong Mariakaphone.
Ban pyniaid ia katei ka jaka yn khot da ka tender bad kiba lah ban thep dei tang ki trai shnong Maraikaphone kat u ba heh dor un ioh ban pyniaid ia ka, da ka jingiatreilang bad ka shnong.
U bah Titosstawel la ong ba ha kaba ia dei bad ka surok ka KHADC kala thoh sha ka PWD ba kan peit lem namar ka dei ka surok shnong, haba ia dei bad ka light kin saw at lat bad kum juh ka um, u kyntu ia ki nongwan jngohkai ba kin long kiba don burom don akor.
Ha kane ka sngi kiwei kiba la kren ki long u bah Mitchell Wnkhar, bah Jambor War, bah Teiborlang pathaw baroh lai ngut ki EM jong ka KHADC, ia ka jingialang la pyniaid da u rangbah shnong u bah Ethelbert Sawain, ban pynphuh ia kane ka sngi la pynphuh pynphing da ki jingrwai bad jingshat na ki samla ka shnong Maraikaphone ha kaba la sakhi lang ki paidbah ka shnong.
