Shillong, Nohprah 3: Mynta ka sngi Myntri Rangbah ka jylla Meghalaya, u Conrad K Sangma, u la plie pyrda iaka State Central Library bad ka iing Ryndia, Shillong kiba dang dep shna thymmai.
U Conrad u la ong ba kane ka prokram kala pyniasoh lang iali lai tylli ki bynta kiba iatrei lang jong ka roi ka par ha Meghalaya, ka jingiada iaka dustur tynrai kaba im, ka jingiohlad ki paidbah iaka jingtip bad ka jingiohlad iaki nongpynmih da ki jingsain tynrai ha ki mar die kiba kham iohi pyrthei bad ki lad ia die kai; kala pyni ruh iaki nongrim kiba kongsan jong ka synshar khaddar lane ka roi ka par ka sorkar bad kala pynshisha iaka jingdonkam jong ka jingpynpaw kyntang iaka Meghalaya lyngba ka jingleit kaba neh bad ka jingda iaka dustur tynrai khnang ba ka roi ka par kan long kaba lah ban pynshisha bad kaba shong nongrim ha ka dustur tynrai.
U la pyntip ruh ba kane ka jaka pule kot ba la pynitynnat thymmai kala pyni phuh iphieng iaka jaka bad ha ka juh ka por ka kyntiew iaka rukom pule kot hapdeng ki khun samla bad ki paidbah.
U la ong ba kaba don ka jingpynbor ban pynlong iaki library kiba iphieng bad ba sngewtynnat da kaba buh ki jingai shakri ba kham bha kumba long ka kafe, sha bad ki jingbam tynrai ban pynshlur iaki khynnah pule ban pynlut por ha ka jingpule khlem da pyndonkam iaki mobile, u la ong bad u la pynpaw ruh iaka jingdonkam ka jingpule kot hapdeng ki samla bad u la khot ieit iaki kmie ki kpa bad ki nonghikai ban iarap ban pynbiang iaka rukom pule kot kaba ryntih ha ki khynnah.
Iaka tamasa State-Level Living Heritage Arts & Craft Village kaba la dep long ruh, kala don iaka dustur ka tynrai ka tipbriew tip blei bad ka kolshor tynrai kaba la iai bteng ban leh ja kylleng ka jylla Meghalaya. Katba iaka House of Ryndia lane ka iing Ryndia kaba la dep plie kala pyni iaka rynsan jong ka jingriewspah ka Meghalaya ha ka thain jain, pynbha iaka leit ka wan ki paidbah bad ka jingiasoh lang ki iew die lang.
Haba kren shaphang ka State Central Library, ia katei ka jaka la shem ha ka 19/Kyllalyngkot/1974 ia kaba la tip kum ka Meghalaya’s apex State Public Library kaba hap hapoh ka Directorate of Arts and Culture. Kumba 50 snem, kane ka library kala ai jingshakri iaki khynnah pule, khynnah rit, stad wad bniah, riewshemphang, ki nongtrei sorkar, kiba la shongthait na ka kam pulit bad ki nongkhreh kot.
Kat haduh ka 1/Lber/2026, ka State Central Library kala don iaki kot kiba la kot haduh 2 lak tylli, ryngkat ki kot magazine, ki kot ba la pynmih da ka sorkar bad ki kot khubor kiba la rim naduh ki snem 1970. Kane ka library kala don kumba 31,000 ngut ki dkhot bad ki jingjia kumba 200 tylli ki kot man ka sngi, kaba mut ba ka jingshah iaki dkhot ban thied ne ban shim iaki kot sha la iing ban pule bad ban pynkit biang hapoh ka por ba la buh, ka jingiarap kyrpang na ki nongtrei library ban wad iaki jingtip ba thikna, ki kot enclyclopedia, ne ki dikshonari kiba ym lah ban pynkit sha iing, ka jingpynbiang iaki kompiwtar bad ka internet khnang ba ki nongpule ki lah ban wad jingtip shuh shuh na ka thup internet bad ban ban thoh iaki kam ki jam jong ki, ka jingpynphriang iaki khubor, ki kot khubor ba dang thymmai bad ki jingpynbna ba dang shen shaphang ki thup kot ne ki jingjia ba thymmai khnang ba ki nongpule kin tip iaki jingshisha ba dang iaid mynta, ka jingai jinghikai ne jingpynsnoh iaki nongpule thymmai shaphang kumno ban pyndonkam iaka library, ban wad kot na ki kor kompiwtar (OPAC) bad ban tip iaki rul ki ain.
Kawei ka bynta ba kyrpang ba don ki kot puriskam, ki kot sngewtynnat, bad ki kot dur kiba pynshlur iaki khynnah rit ban sngewtynnat iaka pule dangle, ka jinghikai kam kaba mut ka kabu ba ai sha ki khynnah skul kiba pule shaphang ka Library Science ban wan hikai kam bad ban ioh iaka jingbit jingbiang hapoh ka kam thikna, ka jingri bad jingpynsah iaki kot khubor bad ki kot khubor man ka sngi ba la rim, kiba long ki jingtip kiba kordor bha na ka bynta kito kiba wad bniah shaphang ka histori. Ka lad kaba suk kaba shah iaki paidbah ban rejister ne ban pyniasoh dkhot bad ka library lyngba ka internet khlem da donkam ban leit hi da ka met sha madan.
La iarap bei tyngka haduh T. 2.23 klur na ka bynta kane ka State Central Library kaba hap hapoh ka National Mission on Libraries. Kane ka Mission ka kyrshan iaka jingpynbiang bad pynbit pynbiang iaki jingtei, ki buit stad teknologi ba thymmai, ka jingiasnoh kam, ki jingshakri ba kham bha bad ka jingioh rung ba kham suk na ka bynta ki kynhun bapher bapher jong ki nongpule kiba wan pyndonkam iaka library. Ka Library ba la shna thymmai ka kynthup iaki kamra pule ba kham bha, ki bynta ban kynshew iaki kot pyrshang bad ki kot rim, ka jaka pule na ka bynta ki khynnah bad ka Knowledge Corner na ka bynta ki samla pule kiba pynkhreh iaki exam ialeh kam lane rung skul ha ka kyrdan jong ka ri.
Kane ka Knowledge Corner ka la sdang pyrshang laitluid naduh u snem 2019–20 bad mynta kala kylla long ka jaka kaba paka bad ba la pyn kyrpang shabar na ka bynta kito kiba ialeh eksam. Ka library ka la pyndonkam ruh iaka software E-Granthalaya, ka Online Public Access Catalogue bad ki rukom Web OPAC, kaba iarap iaki nongpule ban wad bad ban ioh iaki jingtip hapoh ka por kaba kham stet.
