Shillong, Risaw, 15: U Myntri Rangbah ka jylla u Conrad K. Sangma, u la plie pyrda na ka bynta ban rakhe ia ka jingdap 100 snem ka shnong Rilbong, ka Rilbong Durga Puja bad ka Rilbong Sanatan Hindu Dharma Sabha ha Rilbong, Shillong ha ka jingiadon lang u Myntri ka kolshor bad riti dustur, u bah Sanbor Shullai.
Ha katei ka jingrakhe, u Conrad u la ai khublei ia ki nongshong shnong jong katei ka jaka bad ong ba ha kine ki 100 snem ba la dep, katei ka shnong kala pyni phylla ha kaba bun ki rukom, naduh ka jingshongsuk shongsain bad ka jingsuk jingsain hapdeng ki jaidbynriew bapher bapher, haduh ki jingnoh synniang jong ki briew bapher bapher ha ki kyrdan bad ki kam bapher bapher.
Haba kren ha ka Trailblazers Awards lane ka khusnam ba ai ia kiba la khlad noh ba dei ki nongmihkhmat ha ki kam ba thymmai, u Myntri Rangbah u la ai jingiaroh halor ka jingnoh synniang jong ki 25 ngut ki nongioh khusnam hadien ba ki la khlad da kaba ong ba kine kiba lah khlad noh, kila dei kita ki nongmihkhmat kiba kongsan kiba la iarap ha ka por ba jynjar bad kawei ka long ba napdeng kine, kim ju ran dien bad ki ïaid bad tur beit shaphrang ia kaei kaba ki thrang.
U la ai burom bad sngewnguh ia ki bahaiing ha sem jong kiba la khlad, ha kaba u la ong ba ka pateng bad ka jingiaineh jong kine ki briew ka dei ban nang iai bteng, ym tang da kaba pyndonburom bad kynmaw ia ki, hynrei da kaba im bad trei shitom katkum ki nongrim bad ki jingmut jingpyrkhat jong ki.
U Conrad u la kren ruh shaphang ka jingkyrshan jong ka sorkar ia ki kyntoit shnong bad ki kynhun bapher bapher ha kaba u la ong ba ka sorkar ka kyrshan ia ka imlang ka sahlang kaba ialam khmat ban kyntiew ia ki kyntoit shnong lyngba ki Dorbar Shnong, ki komiti jong ki nongshong shnong bad ka kynhun pyniaid kam pyniaid jam hapoh ka shnong, ryngkat ki prokram bakhraw ha sor bad u la ong ba ki jingthmu bad ki projek bapher bapher jong ka sorkar kiba la sdang na ka bynta ban pyn itynnad ia ki sor bah bad kiwei kiwei ki jaka ha khap sor ki long ruh kum ki jingkular ba ym dei tang ban shu pynitynnad hynrei ban don ka jingshong shngain.
U la kren ruh shaphang ka jingkyrshan jong ka sorkar ia ka kolshor bad ki kam ba la seng da ka kynhun kit kam shnong, ha kaba u Conrad u la ong ba ka jylla ka kyrshan ia ka kolshor bad ki tyllong bad ki jaka niam kiba pynneh pynsah ia ka kolshor bad ka riti-dustur, lyngba ka tnad Arts & Culture and Tourism Departments, ka NEC bad ka CMSDF.
U la ai ruh ia ka shithi ban noh synniang T. 25 lakh na ka Chief Minister’s Special Development Fund sha ka Rilbong Sanatan Hindu Dharma Sabha ha kane ka jingrakhe ia kane ka jingdap 100 snem
Katba ki nongioh khusnam ki wan na ki kynhun bapher bapher bad ki kam ba ki trei. Kila pynsah nam ba ia ki jaka pule ha Shillong, ka jingim paidbah bad ka jingpyn ithuh ia ka kolshor, la dep tei da ki briew na man ka imlang ka sahlang. Ia ki nongioh khusnam kiba la khlad, kila ioh khusnam na ka bynta ka jingnoh synniang jong ki bad kiba la ioh khusnam ki long u Khan Saheb Amjad Ali, Ardhendu Chaudhuri, Bibhu Bhushan Chaudhuri, Sudhindra Bhushan Chaudhuri.
Jyotindra Nath Chaudhuri, Saradamanjori Datta, Dr. Basudeb Datta Roy, Dr. Pulin Behari Deb, Dr. Bidhu Bhusan Dutta, Rai Saheeb Shivnath Dutta, Primrose Garfield Gatphoh, Jeewan Ram Goenka, Hopewell Elias Khariong, Brington Buhai Lyngdoh, Mavis Dunn Lyngdoh, Dr. Homiwell Lyngdoh, Neil Nongkynrih, Babu Wilson Reade, Babu Jeebon Roy, Dr. Bidhan Chandra Roy, Rev J.J.M. Nichols Roy, E.N. Shullai, Ratanlal Singhania, U Soso Tham bad u Col.Puran Bahadur Thapa.
Katba ki bahaiing ha sem jong ki nongioh khusnam, kila wan na United State, Delhi, Kolkata, Dibrugarh bad Shillong ban pdiang ia kitei ki khusnam.
