Shillong, Jylliew 22: Ka Voice of the People’s Party (VPP) hynne ka sngi, ka la pynbna tickets kum u kyrtong ka Party u ban iakhun sha ka elekshon MP ka Lok Sabha ka ban long ha u snem 2024, ha kane ka jingpynpynbna u ba la mih kyrteng u dei u General Secretary ka Party Dr. Ricky A.J Syngkon ban ia khun sha katei ka election.
Haba ioh ban iakren bad Vice President ka VPP Dr Kara Chen, U la ong ba kane ka rai ba mih ka dei lyngba Ka State Election Committee (SEC) ka VPP. kaba ia kynduh ha ka 16 tarik Jylliew, bad hadien ka jingiathir kaba sani, kane ka committee ka la rai ban jied ia u General Secretary ka Party Dr Ricky AJ Syngkon kum u kyrtong na ka Shillong Parliamentary Seat ban ia ai reng sha ka elekshon Lok Sabha ban long ha u 2024.
Shuh shuh u la ong, Nalor u Dr Syngkon, ki la don ruh sa arngut kiba pan ticket na ka VPP bad kine ki dei I Dr Bahunlang Tron, Asst Professor ha PGT College bad Prof Lakhon Kma, Professor ka NEHU. Hynrei, Naba u Dr Syngkon u la dei u General Secretary ka Party, SEC ka sngew dei eh ia u artad ba u dei briew uba biang eh ban iakhun na ka party.
Haba kylli haduh katno ka VPP ka sngewskhem ban jop na Shillong Seat, u Dr Chen ula ong “Kum ka seng sain pyrthei shisien ba ka la rung ha ka jylli la kan jop ne rem kam shong eh ha ka jingdon ki MLA namar ki dei ki paidbah kiba rai.
U la pyntip ruh ba ka VPP kan nym pan satia ia kano kano ka jingkyrshan na kiwei pat ki seng sain pyrthei ha kane ka elekshon Lok Sabha. Haba kylli, u Dr Chen ula ong ba ka VPP kam kwah satia ban pynieng ia u President Ardent M Basaiawmoit kum u kyrtong sha ka elekshon MP namar u hap ban pynleit jingmut ia ki kam ka party hapoh ka Jylla.
