Shillong, Lber 04: U Bah Prestone Tynsong Symbut myntri rangbah ka jylla u ba dei ruh u lamphang jong ka kommitee ban wat ia u kyrtong MP Rajya Sabha, mynta ka sngi u la pynbna ba kum ka kynhun Meghalaya Democratic Alliance (MDA) kala shim ia ka rai ban pynieng ia u Dr Wanway Roy Kharlukhi un long u kyrtong na ka bynta ka ilekshon ka ban long ha ka 26 tarik mynta u bnai.
Haba jubab ia ki jingkylli u Bah Prestone u la ong ba u Dr Kharlukhi yn ia khun na ka tiket jong ka party NPP ia kaba un long u kyrtong jong ka kynhun sorkar MDA, ia kane ka rai la shim da ka kynhun sorkar MDA ban ia tylli lang kawei ban kyrshan ia u Dr Kharlukhi kum u kyrtong.
U Bah Banteidor Lyngdoh na ka PDF haba kren lang mynta ka sngi u la ong ba da kawei ka sur kum ka MDA kila shim lang ia ka rai ban kyrshan ia u Dr Kharlukhi. Ha kane ka por ba pynbna la don lang u Bah Samlin Malangniang, u Bah Lahkmen Rymbui bad u Saleng A Sangma.
Ban kdew ba u Dr Kharlukhi u la don lang bad u Purno A Sangma bam kwai ha dwar jong u Blie naduh ka por ba u la shah beh na ka party Congress bad thaw ia ka party NCP, nangta u la don lang ha ka por ba u PA Sangma u don ha ka TMC bad ha dien ba u la seng ia ka party NPP.
