New Delhi, Jylliew 7: U Myntri Rangbah Duh u la ai ka jingsngewlem na ka bynta kito kiba la duh ia la ka jingim ha kane ka khlam. U la ong ba kane ka khlam ka long kaba pynjulor tam ha kine ki 100 snem ba ladep, ia kaba ym pat ju iohi ha kane ka pyrthei da kaba bynrap ba ka ri ka la ialeh pyrshah ia kane ka khlam ha ki bynta bapher bapher. U Modi u la ai ruh katto katne ki jingpynbna kiba donkam.
Namar ba ki bun ki Jylla kiba la kyrpad ba kan don ka jingpynkylla ia ka rukom trei na ka bynta ka jingai dawai tika bad ban wanrah biang ia ka rukom treikam kaba iaid hashuwa ka 1 tarik u Jymmang, u Myntri Rangbah Duh u la ong ba la rai ba ia ka 25% jong ka jingai tika ba la aiti sha ki Jylla, yn shimti noh da ka Sorkar Pdeng.
Ia kane yn sdang pyntreikam hadien 2 taiew. Hadien ar taiew, ka Sorkar Pdeng bad ki Sorkar Jylla kin pyndep ia ka jingpynkhreh ia ki kyndon treikam ba thymmai. U Myntri Rangbah Duh u la pynbna ruh ba hadien ka 21 tarik u Jylliew, ka Sorkar India kan ai ei ia ki dawai tika ia baroh ki briew jong ka ri kiba la dap 18 snem ka rta.
Ka Sorkar India kan thied 75% jong ki dawai tika ba pynmih ki jaka pynmih dawai bad kan ai ei ia kine sha ki jylla. Kan ym don kano kano ka Sorkar Jylla ka ban hap lut ei ei ban ioh ia ki dawai tika. Haduh mynta, da ki klur ki briew ki la ioh ei ia ki dawai tika bad mynta kito kiba la kot 18 snem ka rta ruh kin don bynta ha kane. Ka Sorkar India kan ai ei ia ki dawai tika sha ki briew ka ri, la bynrap u Myntri Rangbah Duh.
U Modi u la pyntip ba ka rukom treikam ha kaba 25% ki dawai tika ki dei kiba thied hi ki hospital shimet kan dang bteng. Ki Sorkar Jylla kin pynthikna ba ki hospital shimet ki shim tang T. 150 ban ai tika bad kane ka lait na ka dor ba hap ban siew na ka bynta ki dawai tika.
Ha kawei pat ka jingpynbna, u Myntri Rangbah Duh u la ong ba ia ka Pradhan Mantri Garib Kalyan Anna Yojna yn dang bteng haduh ka Deepawali. Kane ka mut ba haduh u bnai Naiwieng, 80 klur ngut ki briew kin dang ioh ei katto katne ki mar bam man u bnai. Ha ka por jong kane ka khlam, ka Sorkar ka don lang bad uba duk ba suk bad ka pynbiang ia ki jingdonkam ba kongsan jong u kum u paralok jong u, la ong u Myntri Rangbah Duh.
Ha kaba kynmaw ia ka jingdawa ban ioh ia ka oxygen na ka bynta ka jingsumar ha ka bynta kaba ar jong kane ka khlam ha ki bnai Iaiong bad Jymmang, u Myntri Rangbah duh u la ong ba ngi la lah ban pynbiang ia kane da kaba pyntrei lut ia baroh ki bynta jong ka Sorkar ha kane ka kam. Ha ka histori jong ka India, ym pat ju don kum kane ka jingdawa ban ioh ia ka oxygen na ka bynta ka jingsumar, la ong u Modi.
U Myntri Rangbah Duh u la ong ruh ba ka jingdawa ia ki dawai tika ka kham bun ban ia ka jinglah pynmih dawai tika ha kylleng ka pyrthei. Namar kane, ki dawai tika kiba la shna hi ha ka ri ki long kiba kongsan bha. U Myntri Rangbah u la ong ruh ba mynshuwa ka India ka ju ioh ia ki dawai tika da ki phew snem hadien ba la shna ia ki ha kiewi kiwei ki ri.
Kane ka la pynlong ba ka India kam ju lah ban sdang ia ki prokram ai dawai tika katba kiwei kiwei ki ri pat ki pyndep mardor ia ki kam ai dawai tika. U Modi u la ong ba da kaba trei ha ka rukom ‘Mission Mode’ ngi la lah ban pynioh dawai na ka 60% sha ka 90% ha kine ki 5-6 snem ba la dep. Ngi la pynstet ia ka kam ai dawai tika bad ngi la pyniar ruh ia kane ka kam, la ong u Myntri Rangbah Duh.
U Myntri Rangbah Duh u la ong ba mynta, ka India ka la lah ban iada na ki jingartatien bad lyngba ka rukom trei kaba shai bad kaba khuid, ka polisi kaba shai bad ka jingtrei shitom, ngi la lah ban pyllait paidbah ia ar jait ki dawai tika na ka bynta ka jingpang Corona. Ki stad science jong ngi ki la pyni ia la ka jingtbit. Mynta ngi la lah ban ai dawai tika haduh 23 klur dose ha ka ri.
U Myntri Rangbah Duh u la ong ba ia ka Vaccine Task Force la thung ha ka por ba dang don tang katto katne hajar ki case Covid-19 bad ia ki karkhana shna dawai tika la ai jingkyrshan da ka Sorkar na ka bynta ki jingpyrshang, ka jingpynbiang pisa na ka bynta ka jingwad bniah bad ban shna ia ki dawai tika. U Myntri Rangbah Duh u la ong ba namar ka jingtrei shitom, ka jingpynbiang ia ki dawai tika kan kham biang ha kine ki sngi ban wan.
U la ong ba mynta, hynniew tylli ki karkhana ki pynmih ia ki dawai tika bapher bapher. Ka jingpyrshang ia lai tylli ki dawai tika ba thymmai ki la jan dep, la ong u Myntri Rangbah Duh. U Myntri Rangbah Duh u la kren ruh shaphang ar jait ki dawai tika na ka bynta ki khynnah bad u dawai tika ba ai na khmut.
U Myntri Rangbah u la kren ruh shaphang ki jingsngew halor ka kam ai dawai tika. Katba dang hiar ka jingdon ki case Corona, ki la mih ki jingkylli halor ka jingbym don lad ia ki jylla ban jied bad ki briew ki la kylli balei ka Sorkar Pdeng ka shim ia baroh ki rai. Ki don kiba la kren shaphang ka jinglaitluid ha ka bor ban ioh jied bad ba kam don kawei ka rukom trei kaba iahap lut ia baroh. U Modi u la ong ba naduh ka 16 tarik u Kyllalyngkot haduh ba kut u Iaiong, bun ka kam ai dawai tika ha India la pyniaid hapoh ka Sorkar Pdeng.
Ka kam ban ai ei ia ki dawai tika ia baroh ka dang iaid shakhmat bad ki briew ki la bud ia ki kyndon ban pdiang ka dawai haba ka pali jong ki ka poi. Hapdeng kine baroh, ki la don ki jingdawa ban bate lang ia ka kam ai dawai tika bad ki la don ruh kito kiba la kylli jingkylli halor ka jingjied ia kito kiba dei ban ioh nyngkong ia u dawai. Ki la don shibun ki jingban khia ia ka Sorkar Pdeng bad ki don katto katne ki lad pathai khubor kiba la shim ia kane kum ka campaign.
U Myntri Rangbah Duh u la maham jur ia kito kiba pynsaphriang ia ki khubor lamler shaphang ka kam ai dawai tika. Kine ki briew ki ialehkai bad ka jingem jong ki briew bad ka long kaba donkam bha ban long kiba husiar na kine ki jait briew, la ong u Myntri Rangbah Duh.
