Shillong, Nailar 02: Ka sorkar Meghalaya lyngba ka tnad ialeh kai ka Jylla ka don ka jingthmu ban rah shuh shuh ia ka phutbol ha kane ka jylla, da kaba thmu ban pynmih shen ia ka Mission Football 2.0, la ong u Myntri Rangbah ka jylla u Conrad K Sangma mynta ka sngi ka 2 tarik u Nailar 2024, u la kren ïa kane hadien ba la wai ka jingïakhun nyngkong jong ka Durand Cup 2024 ha nongbah Shillong.
Ia ka Mission Football la sdang da ka sorkar barim ba la ialam da ka Congress ha u snem 2017. Ban tei ia ka jingjop jong ka, u Sangma mynta ka sngi u la ong ba yn pynthymmai ia kane ka jingthmu bad yn sa pynbna shen ia ka skhim ba la pynthymmai, da kaba pynpaw ia ki lad ki lynti kiba thymmai ban kyntiew ia ka phutbol ha ka jylla bad ban kyntiew ia ka ka kolshor jong ka phutbol ha Meghalaya.
U Conrad Sangma u la pyntip ba ka Mission Football ka la pynthikna ban shna ia ki 111 tylli ki Grassroots Centre ha kylleng ka jylla Meghalaya, ha kaba jan 8000 ngut ki khynnah ki ioh jinghikai man la u snem.
Palat 25,000 ngut ki khynnah ki ïashim bynta man la u snem ha ka lympung ïalehkai phutbol U-12 ha ka jylla baroh kawei (kaba dang sahteng mynta u snem) bad ha ka lympung ïalehkai jong ka Subroto Cup ha ka jylla baroh kawei. Ka jingkyrshan ïa ka Meghalaya Football Association ka la lah ban pynïaid ïa ka Meghalaya State League bad ïa ka Meghalaya Youth League kaba thymmai.
Kum ka jingpynjlan ia kane ka skhim, u Sangma u la pynbna ruh ia ka Local Football Club Support Scheme, ha kaba ki klob kiba pawnam kiba iashim bynta ha ka I-League 2 shaneng ki lah ban pan jingiarap pisa haduh 3 klur tyngka, bad ki klob kiba rit paid/pdeng ki lah ban pan jingiarap haduh 2000 tyngka. haduh Rs 15 lak.
U CM u la kyntu ïa ki nongshong shnong ka nongbah Shillong ba kin mih paidbah ban peit ïa ki jingïalehkai jong ka Durand Cup. U la ong ruh ba ngi sngewkmen ban pyndonkam ïa kane ka por ban ïasam ïa ki jingthmu ba ka sorkar ka la sdang na ka bynta ka phutbol bad kiwei kiwei ki jingïalehkai ha ka jylla. Kum kine ki jingpynlut ha ki jingtei, ki jingïalang bad ki grant kim dei ka jingpynlut hynrei ka dei ka jingbei tyngka ha ki samla jong ngi.
Ka jylla ka don ka jingkyrmen ban wanrah ia ki jingialehkai international sha nongbah Shillong bad ka la pynthymmai ia ka Jawaharlal Nehru Stadium ban pynbiang ia ki jingdonkam, kum ki floodlight kiba shai bha na ka bynta ban pyni telebishon ia ki jingialehkai, ka madan natural turf, ka jingpynbha ia ki jaka shong bad ki kamra riam.
Kaba kham lah ban long, la kumno kumno ha ka por ba lyngkot, ka dei tang kawei ne ar tylli ki jingïalehkai jong ka Indian Super League, ha kaba ka sorkar Meghalaya kan long ka nongkyrshan ba kongsan jong ka NorthEast United FC ha ka ISL. Ka sorkar lyngba ka Meghalaya Tourism ka la pynlut haduh T. 10 klur ban kyrshan ia ka NEUFC bad ia ka I-League’s Shillong Lajong FC.
Ka sorkar ka la ia soi ruh ia ka jingiateh bad ka NorthEast United na ka bynta ka Franchise ban buh ia ka Residential Academy ha New Shillong Township kata ha Mawkhanu.
