Shillong, Risaw 03: U President ka BJP Meghalaya State Unit, u Rikman G. Momin ha ka jingiadon lang u Myntri ka sorkar jylla, u bah Sanbor Shullai bad ki nongialam ka party kila pdiang burom ia u bah Moonlight Pariat, u MDC jong ka Jowai South Constituency sha ka party lem bad iaki nongkyrshan jong u.
U bah Moonlight Pariat u la jop iaka MDC sha ka iing dorbar jong ka Jaintia Hills Autonomous District Council hynriew sien lynter naduh u 1994 haduh u 2009 u la jop na ka Jowai Central Constituency bad ha u snem 2014 bad 2025, u la jop na Jowai South Constituency.
Ha kine ki snem jong ka jinglong nongmihkhmat jong u sha JHADC u la bat iaki kam bapher bapher, u la shah jied kum u Chief Executive Member, u la shah jied ruh kum u shongknor ka iing dorbar ha JHADC bad u la shah thung ruh kum u EM ha ki shnat treikam bapher bapher hapoh ka Council.
Haba kren ha kane ka jingialang hadien ba la pdiang ia u sha ka party BJP, u bah Moonlight u la ong ba kane ka jingkhang dam ban tih dewiong ha Meghalaya kala iaid mynta 12 snem eiei kaba lyngoh ka long ba ha shi lynter ka wah Kupli ha ki bynta jong ka jylla Meghalaya, la khang iaka jingtih dewiong katba sha shiliang ka wah Kupli kaba hap ha Assam kaba dei ha kajuh ka wah, ka jingtih dewiong ka iaid beit.
U bah Moonlight u la pynkynmaw ba ka seng samla pule Dimahasao kala mudui sha iing bishar ha kaba kala kynnoh ba ka wah Kupli kala jaboh bad ktah iaka jingpynmih bording ka NEEPCO na ka daw jong ka jingtih dewiong hynrei ka jingkylli ka long balei ka National Green Tribunal ka khang tang iaka Meghalaya ym iaka Assam, Kaei kane.
U bah Pariat u la ong ba lada don ka jingpynsngewthuh ba tikna sha ki nongialam ka sorkar pdeng ka don ka lynti ban pyllait iaka jingtih dewiong, kum u nongmihkhmat u la leit kylleng sawdong ka Jaintia Hills bad u iohi haduh katno kala ktah iaki paidbah nongshong shnong bad u la ong ba ha u snem 2028 ka BJP kan sa synshar ha Meghalaya.
