Shillong, Nohprah 11: U kyrtong ka United Democratic Party na Nongkrem Constituency ka election shiteng samoi ka Khasi Hills Autonomous District Council, u Bah HS Shylla u la ther tyngeh ia u MLA ka Nongkrem u Bah Ardent Miller Basaiawmoit halor ka nongrim ba u ne u MLA u la shet kylla ia ki paidbah ka Constituency da kaba kohnguh ia ka Meghalaya Urban Development Authourity (MUDA) ha ka jingialang ialap election ha ka 10 tarik u Nohprah ha madan Lad Nongkrem.
Ha kane ka jingialang la ia don lang ruh da ki nongkitkam ka UDP Nongkrem Constituency, U Bah Hilarius Warbah, u Bah Remington Pyngrope, MLA ka Mawkynrew Constituency kumjuh i kmie jong u Bah HS Shylla i ba la wan ban ia synran bad ai jingkren ha kane ka jingialang nalor kiwei kiwei kiba la ai jingkren. Ia ka jingialang la pyniaid da ka kong Pretty Pyngrope bad ha kane ka sngi la iohi ia ka jingshad paidbah ha shwa ban sdang ka jingialang bad kumjuh ruh haba la wai ka jingialang ha kaba ki paidbah palat san hajar ngut ki la pynthikna ka jingjop ia u Bah HS Shylla ha kane ka election shiteng samoi ka ban long ha ka 13 tarik.
Na bun ki nongai jingkren kiba la kynthoh bad pynshai ia ki jingkren pyrshah u Bah Ardent ia u Bah HS Shylla, u Bah Hilarius u la pynpaw ba ha kane ka sngi ba ka pyrthei ka rakhe ia ka Human Rights Day bad ka UDP ka rakhe ia kane ka sngi ban ioh ia ka hok da ka jingjop ha kaba u paidbah u la wan ban pyni ia ka jingkyrmen ban ioh jingjop ha kane ka election shiteng samoi. Halor ka jingkynthoh u Bah Ardent ba ym donkam aktor hynrei tang ki nongrep ha Nongkrem Constituency, u Bah Hilarius u la ong ba ka kam ak phlim ka la kut hynrei u bah Ardent u dei ban tip ba watla u dei u aktor hynrei u dei hi u khun nongrep.” Nga nang ban trei ki kam kum u nongrep bad nga dei u khun jong ki kmie ki kpa kiba rep”, la ong u Bah Hilarius.
Na ka liang jong i kmie u Bah HS Shylla iba la ai jingkren i la pynpaw ia ka jingsngew nguh ia ki paidbah kiba la wan sha kane ka jingialang. ” Na ka bynta ka jingieid bad jingshaniah jong phi ia u khun jong nga, ai ba u Blei un kyrkhu ia phi bad kaei kaei baroh don bok kan long kaba bha”, la ong i kmie u Bah HS Shylla kum ka jingkyrkhu ia ki paidbah. U Kyrtong haba ai jingkren u la pynpaw ia ki lynti kumno u la poi sha ka sain pyrthei naduh ka ka por ka APHLC bad kumno la shna ia ka Land Transfer Act kaba long kum uwei u mawbyrsiew na ka bynta ka jaidbynriew. “Hynrei nga lyngngoh kumno ba u Bah Ardent u kwah ban pynduh ia ka District Council kaba ri kaba kdup ia ka jinglong janai ka jaidbynriew “, la ong u Bah Shylla.
La ong shuh shuh “Nga ieng halor ka nongrim ban pynsngewthuh paidbah halor ki ain kiba thmu ban syngit ia ka jaidbynriew kumta nga wan phai biang sha ka sain pyrthei”, u la ong shuh shuh bad bynrap ba kumno u bah Ardent u kam ba ki lad pathai khubor ki thok man ba ki khubor ki pynpaw halor ki jingleh jingkam jong u kumba ka HSPDP ka la weng na ka ba kyrshan halor ka ishu kum ka jong ki Rangbah Shnong bad kumno ruh kumba pynapw kawej ka kot khubor ba u jah klep na ka Ing Dorbar Thaw Ain ka jylla haba la wanrah ia ka mat iakren halor ka MUDA.
U bah Shylla u la kynthoh ruh ba kumno u MLA u pynpaw ba u Bah Shylla u thok hynrei u dei ban sngewthuh ba kumno un shah thok tang ha u wei u briew bad kane ka pyni ba um ler hi ruh ban shah thok tang ha u wei u briew. “Ka Congress kaba lam khmat ha ka sorkar jylla ka la pyrshang ban pynduh ia ka District Council halor ka nongrim ba ka mait ia ka kam bat ar maloi bad u paidbah u sngewthuh ba ka Congress kam kwah ban pyniakhun MDC shuh ha kane ka kynti ba mynta”, la kynthoh shuh shuh u Bah Shylla. Na ka liang jong u bah Shylla u la kynthoh ruh ba u Bah Ardent u dei u agent jong ki company kiba heh da kaba thmu ban pynduh iaka District Council.
U Bah Shylla u la kynthoh ruh ba u Ardent u la sdang na la ing hi ban shim jaid na u kpa kaba long pyrshah ia ka Khasi Linage Act. U la kynthoh ruh ba u Bah Ardent u la pyrshang ialam bakla ia ki paidbah ka jaidbynriew da ka Marriage Rule bad Marriage Act ha kaba hap leit register ha KHADC hadien ba ki la shongkha bad lada ym lah ban register kin shah kem bad shah thep phatok.
