Shillong, Rymphang 01: U Myntri Rangbah ka jylla u Conrad K Sangma mynta ka sngi u la pynlait paidbah ia ki 207 tylli ki kali Elektrik ban kit synrum ha ki shnong, kane ka skhim ka dei jong ka sorkar pdeng kaba la tip kum ka Swach Bharat Mission, ia kine ki kali ym sam sha ki saw tylli ki District, ka East Jaintia Hills, Eastern West Khasi Hills, East Khasi Hills bad West Jaintia Hills.
Haba kren ha kane ka jingialang kaba la long ha Madan Kurkalang ha Ri Bhoi District la ong ba kane ka dei lyngba ka Swach Bharat Mission jong ka sorkar pdeng kane kajingthmu ka long ban pynlong ia baroh ki shnong ba kin don la ka jong ka jaka leit bar ma ki thliew iing. Ha Meghalaya ki long iing kiba la don la ka jong jaka leit bar kala kot sha ka 84.33% naka 10% ba long mynshuwa.
Ka sorkar ka buh ia kthong ban pynkot sha ka kyrdan kaba shiphew ha ka roi ka par, kane ka jingsam ia kine ki kali Elektrik kan long shibynta jong ka jingiatreilang bad ki kynhun bapher bapher na ka bynta ban kyntiew ia ka roi ka par, ha kane ka sngi la pynbna ruh ba yn sa pynkhuid ia ki shnong bad ki jaka sor man ka shisien lai bnai bad yn sdang naduh u ne u snem mang tyngka ba mynta ban pynlong ia ki shnong kiba khuid.
U myntri rangbah la ong ba ka jingkhuid kadei ka bynta jong ki riewlum, hynrei na kidaw kiba ym lah ban tip kam shym don shuh kata ka jingbteng ia kane ka kam leh khuid, kumta kala dei ban pynkhi imbiang ia kane ka jingleh khuid bad ka long kaba don kam ban pynkuid ia ki sawdong sawkun.
U myntri ba dei peit ia ka tnad sam um u Marcuise M Marak la ong ba ka sorkar kala kut jingmut ban pynlong ia ka jylla Meghalaya kaba khuid, ka sorkar kala kut jingmut ban pynlong ia ka jylla Meghalaya ba baroh ki long iing kin don ia ka jaka leit bar ha u snem mang tyngka 2024-2025.
Na ka skhim PMAY la mang ban shna jala leit bar 1553 tylli, ki jaka leit bar paidbah yn shna 570 tylli bad ki jaka bad jaka leit bar bala ban buh ki don 18 tylli ia ki yn buh ha kylleng ki bynta jng ka jylla, la ong ba ia kine ki 207 tylli ki kali Elektrik yn sam sha ki blok bapher bapher ha Khasi Hills bad ia kane ka juh ka prokram yn la pynlait paidbah ha Garo Hills.
Ha kane ka sngi ki ar ngut ki Symbut myntri rangbah ka jylla u bah Prestone Tynsong bad u bah Sniawbhalang Dhar kila ia don lang, ka myntri ka tnad ka koit ka khiah ka Dr. Ampareen Lyngdoh ruh kala don lang ha kane ka sngi ryngkat ki heh sorkar na ka tnad sam um jong ka jylla bad jong ka Shillong Municipal Board.
