Shillong, Iaiong 07: Mynta ka sngi ka Apollo Trinity Medical Centre, Shillong kala pynlong ia ka jingpeit ei ia ki nongiaid kai step ha Nan Polok ha kane ka sngi rakhe baroh shi tyllup ka pyrthei ia ka ‘World Health Day’.
Ka jingthmu jong kane ka jaka ai jingsumar jong ka shnat sumar jong ka Aoplo ha Shillong ka long ban rakhe ia ka jingdon kam ban ioh ia ka met kaba koit ba khiah, ha ka liang ka met, ka pyrkhat pyrdain bad ka jingsngew kaba khlian.
Ka jingkoit jingkhiah ka dei ka spah bah kaba kor dor tam bad lada ka don ka jingkylla tang khyndiat ha ka bor met bad kane kan ktah ia ka jinglong jingman ha u ne ka briew ia kaba don kam ban sumar.
Ka Apollo Trinity Medical Centre Shillong ka dei ka shnat ai jingsumar jong ka Hospital Apolo na Chennai kaba la don ia ka shnat sumar jong ka mynta ha kane ka nongbah Shillong bad kane ka jingpeit ei mynta ka sngi ka dei ka sien kaba nyngkong bala pynlong da kane ka jaka ai jingsumar.
